Hinduja Family: స్విస్ కోర్టు సంచలన తీర్పు.. హిందుజా కుటుంబంలోని న‌లుగురికి జైలు శిక్ష!
- స్విస్‌లోని విల్లాలో ప‌నిచేసే సిబ్బందిపై హిందుజా ఫ్యామిలీ శ్ర‌మ‌దోపిడీకి పాల్ప‌డ్డార‌ని కేసు
- ఈ కేసులో ప్ర‌కాశ్ హిందుజా, ఆయ‌న భార్య క‌మ‌ల్‌కు ఒక్కొక్కరికి నాలుగున్న‌రేళ్ల జైలు శిక్ష
- వీరి కుమారుడు అజయ్, అతని భార్య నమ్రతకు నాలుగేళ్ల చొప్పున జైలుశిక్ష
భార‌త సంత‌తికి చెందిన బ్రిట‌న్ సంప‌న్న హిందుజా కుటుంబంలోని న‌లుగురికి శ్ర‌మ‌దోపిడీ కేసులో జైలు శిక్ష ప‌డింది. స్విట్జ‌ర్లాండ్‌లోని విల్లాలో ప‌నిచేసే సిబ్బందిపై శ్ర‌మ‌దోపిడీకి పాల్ప‌డ్డార‌నే కేసులో ప్ర‌కాశ్ హిందుజా, ఆయ‌న భార్య క‌మ‌ల్‌కు నాలుగున్న‌రేళ్లు, కుమారుడు అజయ్, కోడ‌లు నమ్రతకు నాలుగేళ్ల చొప్పున స్విస్ న్యాయ‌స్థానం జైలు శిక్ష‌ను ఖ‌రారు చేసింది. అయితే, కోర్టు తీర్పుపై నలుగురు నిందితులు పైకోర్టులో అప్పీలు చేసుకోనున్నారు.
ఇక హిందుజా కుటుంబ సభ్యులు కార్మికుల శ్ర‌మ‌దోపిడీతో పాటు వారికి స్వల్ప ఆరోగ్య ప్రయోజనాలను అందించడంలో కూడా విఫ‌ల‌మ‌య్యార‌ని స్విస్ కోర్టు తన ఉత్తర్వుల్లో పేర్కొంది. సిబ్బందికి చెల్లించే వేతనాలు స్విట్జర్లాండ్‌లో అటువంటి ఉద్యోగాలకు చెల్లించే వేతనంలో పదో వంతు కంటే తక్కువగా ఉన్నాయని న్యాయ‌స్థానం పేర్కొంది. కాగా, హిందుజా ఫ్యామిలీపై ఉన్న మానవ అక్రమ రవాణా ఆరోపణలను కోర్టు కొట్టివేసింది.
బ్రిటన్‌లోని అత్యంత సంపన్నులైన హిందుజా కుటుంబం కార్మికుల పాస్‌పోర్ట్‌లను కూడా స్వాధీనం చేసుకున్నట్లు ప్రాసిక్యూషన్ ఆరోపించింది. ఉద్యోగుల్లో ఎక్కువ మంది నిరక్షరాస్యులైన భారతీయులు ఉన్న‌ట్లు తెలిపింది. ఒక ఉద్యోగి జీతం కంటే తమ కుక్క కోసం ఎక్కువ ఖర్చు చేశారని కూడా ఆరోపించారు. పైగా ఉద్యోగులకు స్విస్ ఫ్రాంక్‌లు కాకుండా రూపాయల్లోనే జీతాలు ఇచ్చేవారని ప్రాసిక్యూషన్ పేర్కొంది.
నలుగురు కుటుంబ సభ్యులు కార్మికులను విల్లా నుండి బయటకు రాకుండా నిర్బంధించిన‌ట్లు తెలిపింది. వారితో ఎక్కువ గంటలు పని చేయమని బలవంతం చేశారని ఆరోపించింది. ప‌లు సందర్భాల్లో సిబ్బంది విరామం లేకుండా రోజుకు 18 గంటల వరకు పని చేయవలసి వచ్చిందని ప్రాసిక్యూషన్ చెప్పుకొచ్చింది.
