cat: కుక్క, పిల్లి, కోతి క్యూట్ ఫ్రెండ్ షిప్! వీడియో వైరల్
- జాతి వైరం మరచిన జంతువులు
- పక్కపక్కనే కూర్చొని సేదతీరిన వైనం
- నెటిజన్ల ఫిదా.. ఆ జంతువుల మనసులు కలిశాయంటూ కామెంట్
సాధారణంగా పిల్లి కనిపిస్తే చాలు కుక్క వెంటపడి తరుముతుంది. దాన్ని చంపాలని చూస్తుంది. అలాగే కోతికి, కుక్కకు పడదు. కుక్కను కోతి తెగ ఆటపట్టిస్తుంది. కానీ సోషల్ మీడియాలో చక్కర్లు కొడుతున్న ఓ 43 సెకన్ల వీడియో నెటిజన్లను ఆకట్టుకుంది. జాతి వైరం మరచి కుక్క, పిల్లి, కోతి స్నేహంగా మెలగడం అందరినీ ఆశ్చర్యపరుస్తోంది.
ఆ వీడియోలో కుక్క, పిల్లి, కోతి పక్కపక్కన కూర్చున్నాయి. కుక్క ముందటి కాళ్ల మధ్యన పిల్లి ముడుచుకొని కూర్చోగా ఆ రెండింటినీ ఆనుకొని కోతి కూర్చుంది. అలసిపోయినట్లు కనిపించిన కుక్క, పిల్లి కునుకు తీసేందుకు ప్రయత్నిస్తుంటే కోతి తన పేరుకు తగ్గట్లుగానే ప్రవర్తించింది. కుక్క నోట్లో వేలు పెట్టి దాన్ని చికాకు పరిచింది. అలాగే దాన్ని ముద్దాడింది. ఆ తర్వాత తన తల గోక్కొని పేలను నోట్లో వేసుకోవడం వీడియోలో కనిపించింది.
ప్రముఖ సోషల్ మీడియా ప్లాట్ ఫాం ‘ఎక్స్’లో ఈ వీడియో పోస్ట్ అయిన రెండు రోజుల వ్యవధిలోనే దీనికి 11 లక్షల వ్యూస్ లభించాయి. దీన్ని చూసిన నెటిజన్లంతా రకరకాల కామెంట్లు పోస్ట్ చేశారు. ఆ భౌతిక తేడాలను అధిగమించి ఆ జంతువుల మనసులు కలిశాయంటూ ఓ యూజర్ అభిప్రాయపడగా.. ఇదో హ్యాపీ ఫ్యామిలీ అంటూ మరొకరు కామెంట్ చేశారు. సమాజంలో ప్రజలంతా కుల, మతాలకు అతీతంగా శాంతియుతంగా జీవించాలనే సందేశాన్ని ఈ వీడియో చాటిచెబుతోందని మరొకరు పోస్ట్ చేశారు.
