Sofa: ఇంటర్నెట్లో వైరల్ అవుతున్న సోఫా వాహనం... వీడియో షేర్ చేసిన ఆనంద్ మహీంద్రా
- రోడ్డుపై రివ్వున దూసుకెళుతున్న సోఫా వాహనం
- సోషల్ మీడియాలో వైరల్ అవుతున్న వీడియో
- ఆర్టీవో ఇన్ స్పెక్టర్ ఇలాంటి వాహనం చూస్తే ఎలా ఉంటుందంటూ ఆనంద్ స్పందన
సోషల్ మీడియాలో ఏ ఆసక్తికరమైన అంశం దర్శనమిచ్చినా అది ప్రముఖ వ్యాపారవేత్త ఆనంద్ మహీంద్రా దృష్టిని దాటిపోదంటే అతిశయోక్తి కాదు. సోషల్ మీడియాతో అంతగా ఆయన మమేకం అవుతారు. తాజాగా ఆయన ఓ ఆసక్తికర వీడియోను పంచుకున్నారు.
అందులో ఇద్దరు వ్యక్తులు గ్యారేజిలో సోఫాపై కూర్చుని ఉండడం కనిపిస్తుంది. ఉన్నట్టుండి ఆ సోఫా గ్యారేజిలోంచి బయటికి వచ్చి రోడ్డుపై రివ్వున దూసుకెళుతుంది. రోడ్డుపై ఇతర వాహనాల్లానే ఆ సోఫా కూడా ప్రయాణిస్తుంది. ఆ ఇద్దరు వ్యక్తులు సోఫాపై కూర్చుని ఎక్కడెక్కడికో ప్రయాణిస్తారు. అంతేకాదు, ఆ సోఫా వాహనం మేకింగ్ ను కూడా ఆ వీడియోలో చూడొచ్చు.
దీనిపై ఆనంద్ మహీంద్రా స్పందించారు. "చూడ్డానికి ఇది సరదా ప్రాజెక్టులానే అనిపిస్తుంది. కానీ ఇందులో వాళ్ల కుతూహలం, ఇంజినీరింగ్ పనితనాన్ని చూడండి. ఆటోమొబైల్ రంగంలో ఏ దేశమైనా గొప్పగా ఎదగాలంటే ఇలాంటి గ్యారేజ్ శాస్త్రవేత్తలు అవసరం. ఇలాంటి వాహనం రిజిస్ట్రేషన్ కు వెళ్లినప్పుడు ఆర్టీవో ఇన్ స్పెక్టర్ ముఖం ఎలా ఉంటుందో చూడాలనుకుంటున్నాను" అని ట్వీట్ చేశారు.
