Sagar: 'మొగలి రేకులు' సాగర్ కు కీలక బాధ్యతలు అప్పగించిన పవన్ కల్యాణ్
- ఇటీవల జనసేన పార్టీలో చేరిన నటుడు సాగర్
- సాగర్ ను పార్టీ ప్రచార కార్యదర్శిగా నియమించిన పవన్ కల్యాణ్
- తెలంగాణలో జనసేన-బీజేపీ కూటమి సిద్ధాంతాలను ప్రజల్లోకి తీసుకెళ్లాలని సూచన
- కూటమి అభ్యర్థుల విజయం కోసం కృషి చేయాలని దిశానిర్దేశం
'మొగలి రేకులు' టీవీ సీరియల్ తో ఎంతో గుర్తింపు తెచ్చుకుని, సినీ నటుడిగానూ ఎంట్రీ ఇచ్చిన ములుకుంట్ల సాగర్ ఇటీవల జనసేన పార్టీలో చేరిన సంగతి తెలిసిందే.
ఈ నేపథ్యంలో, సాగర్ కు జనసేనాని పవన్ కల్యాణ్ పార్టీలో కీలక బాధ్యతలు అప్పగించడం విశేషం. సాగర్ ను తెలంగాణలో జనసేన పార్టీ ప్రచార కార్యదర్శిగా నియమించారు. ఈ మేరకు హైదరాబాదులోని ప్రశాసన్ నగర్ లో ఉన్న జనసేన పార్టీ ప్రధాన కార్యాలయంలో జరిగిన ఓ కార్యక్రమంలో, పవన్ కల్యాణ్ నటుడు సాగర్ కు నియామక పత్రాన్ని అందించారు.
తెలంగాణ ఎన్నికల్లో జనసేన-బీజేపీ కూటమి సిద్ధాంతాలను బలంగా ప్రజల్లోకి తీసుకెళ్లాలని , ఎన్నికల్లో కూటమి అభ్యర్థుల విజయం కోసం కృషి చేయాలని సాగర్ కు పవన్ కల్యాణ్ దిశానిర్దేశం చేశారు. పార్టీ ప్రచార కార్యదర్శిగా బాధ్యతలు సమర్థంగా నిర్వహించాలని ఆకాంక్షించారు.
