healthy Eyes: కంటికి కళ్లద్దాలు రాకుండా ఉండాలంటే..?
- ముందస్తు వైద్య పరీక్షలు తప్పనిసరి
- పోషకాహారాన్ని తీసుకోవాలి
- పొగతాగడం మానివేయాలి
- బయటకు వెళ్లినప్పుడు సన్ గ్లాసెస్ అవసరం
సర్వేంద్రియానాం నయనం ప్రధానం. కంటి చూపు ఉన్నప్పుడే కదా ఈ ప్రపంచాన్ని వీక్షించగలం. కంటి ఆరోగ్యం మన చేతుల్లోనే ఉంది. పోషకాహారం తీసుకోవడం ద్వారా కళ్లను పదిలంగా కాపాడుకోవచ్చు. పోషకాల లేమి, వయసు ప్రభావంతో కంటి చూపు తగ్గిపోవడం మామూలే. దీనికితోడు క్యాటరాక్ట్ (శుక్లం) సమస్య కూడా 50 ఏళ్లు దాటిన వారిలో కనిపిస్తుంది. ఇప్పుడు రెటీనా సమస్యలు కూడా ఎక్కువగా కనిపిస్తున్నాయి. రెటీనాకి చికిత్స లేదు. గ్లకోమా (నీటి కాసులు) కూడా కంటిచూపును దెబ్బతీసే నిద్రాణ మహమ్మారి. గ్లకోమా ఉన్నట్టు బయటకు తెలియదు. అందుకే ఏడాదికోసారి అయినా కళ్లకు పరీక్ష చేయించుకోవడం అవసరం.
కంటి చూపునకు సంబంధించి ఇప్పటి వరకు ఎలాంటి సమస్యలు లేకపోయినా, ఏడాదికోసారి కంటి పరీక్షలు చేయించుకోవాలన్నది వైద్యుల సూచన. కుటుంబం చరిత్రలో ఎవరికైనా గ్లకోమా ఉంటే, 40 ఏళ్ల తర్వాత ఏడాదికోసారి తప్పకుండా పరీక్ష చేయించుకోవాలి. దీనివల్ల కంటి సమస్యలను ఆరంభంలోనే గుర్తించొచ్చు. ఇది చికిత్సను సులభం చేస్తుంది. సాధారణంగా 40 దాటిన తర్వాత నుంచి చూపులోనూ సమస్యలు వస్తుంటాయి. వైద్యులు పవర్ గ్లాస్ సూచిస్తే వాటిని తప్పకుండా వాడడం మంచిది. ప్రతి రెండేళ్లకు ఒకసారి సమగ్ర కంటి పరిశీలన చేయించుకోవాలని అమెరికన్ అకాడమీ ఆఫ్ అప్తమాలజీ సూచన. ఎదుట ఉన్న ఒక వస్తువు రెండుగా కనిపిస్తుంటే వైద్యులను సంప్రదించాలి.
- నేడు కంప్యూటర్లు మొబైల్ ఫోన్లపై అధిక సమయం గుడుపుతున్నారు. స్క్రీన్లను చూస్తున్న సమయంలో కనీసం కళ్లను ఆర్పడం కూడా మర్చిపోతుంటారు. దీంతో కళ్లు పొడిబారతాయి. ఈ ఇబ్బంది లేకుండా ఉండేందుకు ప్రతి 20 నిమిషాలకు 20 అడుగుల దూరంలో 20 సెకండ్ల పాటు చూడాలి.
- సరిపడా నిద్ర లేకపోతే కళ్లు ఎర్రగా మారిపోతాయి. రోజులో కనీసం 6-8 గంట నిద్ర ఉండేలా చూసుకోవాలి.
- కళ్లను నలుపకూడదు. దీనివల్ల సున్నితమైన లేయర్లు దెబ్బతింటాయి. ఏడాదికోసారి కళ్లద్దాలను మార్చుకోవాలి.
