Chandrababu: బెల్జియం, లండన్ లోనూ చంద్రబాబుకు మద్దతుగా ప్రదర్శనలు
- స్కిల్ కేసులో చంద్రబాబు అరెస్ట్
- చంద్రబాబుకు మద్దతుగా కదం తొక్కుతున్న తెలుగు ప్రజలు
- బెల్జియం రాజధాని బ్రస్సెల్స్ లో నిరసనలు
- అమెరికాలోని ఫిలడెల్ఫియాలో చంద్రబాబుకు తెలుగు సంఘాల మద్దతు
- లండన్ లో వీధుల్లోకి వచ్చిన తెలుగు ప్రజలు
టీడీపీ అధినేత చంద్రబాబును స్కిల్ కేసులో అరెస్ట్ చేయడాన్ని వ్యతిరేకిస్తూ విదేశాల్లోనూ నిరసనలు వ్యక్తమవుతున్నాయి. గత కొన్నిరోజులుగా ప్రవాసాంధ్రులు అనేక దేశాల్లో చంద్రబాబుకు మద్దతుగా ప్రదర్శనలు చేపడుతున్నారు.
తాజాగా యూరప్ లోని బెల్జియం దేశంలో ఎన్నారై టీడీపీ ఆధ్వర్యంలో 'మేము సైతం బాబు గారికి తోడుగా' కార్యక్రమం చేపట్టారు. చంద్రబాబు అరెస్ట్ ను ఖండిస్తూ మేము సైతం బాబు గారికి తోడుగా అనే కార్యక్రమాన్ని బెల్జియంలోని బ్రసెల్స్ నగరం అటోమియం ముందు శనివారం సాయంత్రం నిర్వహించారు. ఈ కార్యక్రమంలో జనసేన నాయకులు కూడా పాల్గొని తమ సంఘీభావాన్ని ప్రకటించారు. భవిష్యత్తులో ఉమ్మడిగా మరిన్ని కార్యక్రమాలు చేపడదాం అని తెలిపారు.
అటు, అమెరికాలోని ఫిలడెల్ఫియాలోనూ పలు తెలుగు సంఘాలకు చెందినవారు నిరసన ప్రదర్శనలు చేపట్టారు. సాఫ్ట్ వేర్ రంగంలో ఎన్నో విప్లవాత్మక మార్పులు తెచ్చి, ప్రపంచ దిగ్గజ ఐటీ కంపెనీలను ఆంధ్రప్రదేశ్ కు తీసుకువచ్చిన గొప్ప నేత చంద్రబాబు అని అమెరికా ప్రవాసాంధ్రులు కొనియాడారు. హైదరాబాదును సాఫ్ట్ వేర్ హబ్ గా మార్చిన విజినరీ లీడర్ అని కీర్తించారు.
బ్రిటన్ లోనూ చంద్రబాబుకు సంఘీభావంగా ప్రదర్శనలు చేపట్టారు. లండన్ నగరంలో తెలుగు ప్రజలు చంద్రబాబుకు మద్దతుగా వీధుల్లోకి వచ్చారు. ప్లకార్డులు ప్రదర్శిస్తూ, చంద్రబాబు అరెస్ట్ అక్రమం అని నినదించారు.
