Krithi Shetty: తనపై తీవ్రస్థాయిలో పుకార్లు వస్తుండడం పట్ల కృతి శెట్టి స్పందన
- కృతి శెట్టి ఇంటర్వ్యూ అంటూ కొన్ని కథనాలు
- ఓ స్టార్ హీరో కొడుకు వేధిస్తున్నాడని కృతి శెట్టి చెప్పినట్టు కథనాలు
- ఖండించిన కృతి శెట్టి
- తప్పుడు ప్రచారం చేస్తున్నారంటూ ట్వీట్
ఉప్పెన చిత్రంతో టాలీవుడ్ వెండితెరకు పరిచయమై కొద్దికాలంలోనే ప్రేక్షకుల హృదయాల్లో స్థానం సంపాదించిన నటి కృతి శెట్టి. గత కొన్ని రోజులుగా కృతి శెట్టి ఇంటర్వ్యూ అంటూ పలు కథనాలు మీడియాలో దర్శనమిస్తున్నాయి.
ఓ స్టార్ హీరో కొడుకు తనను స్నేహం పేరిట వేధిస్తున్నాడని, ఎక్కడికి వెళ్లినా తోడు రమ్మంటున్నాడని కృతి శెట్టి చెప్పినట్టు ఆ కథనాల్లో పేర్కొన్నారు.
ఈ కథనాలపై నటి కృతి శెట్టి స్పందించారు. ఈ వార్తల్లో ఎంతమాత్రం నిజం లేదని స్పష్టం చేశారు. తానెప్పుడూ అలా చెప్పలేదని కొట్టిపారేశారు. ఈ పుకార్లను పట్టించుకోకూడదని భావించానని, కానీ తప్పుడు ప్రచారం తీవ్రస్థాయిలో జరుగుతుండడంతో స్పందించక తప్పలేదని వివరణ ఇచ్చారు.
అవన్నీ నిరాధారమైన వార్తలని, వాటిని ఎవరూ నమ్మవద్దని స్పష్టం చేశారు. ఈ మేరకు కృతి శెట్టి ట్వీట్ చేశారు. ఇలాంటి తప్పుడు కథనాలు వండి వార్చడం ఆపేయాలని ఆయా మీడియా సంస్థలకు హితవు పలికారు.
