Chandrababu: మొదటి ఎర్రిపప్ప తాడేపల్లిలో ఉన్నాడు... రెండో ఎర్రిపప్ప ఇక్కడ ఉన్నాడు: చంద్రబాబు

12-05-2023 Fri 22:07 | Andhra

తణుకులో రైతు పోరు బాట
12 కిలోమీటర్లు పాదయాత్ర చేసిన చంద్రబాబు
అకాల వర్షాలతో నష్టపోయిన రైతులకు పరామర్శ
చంద్రబాబుకు తమ కష్టాలు చెప్పుకున్న రైతులు
జగన్, కారుమూరిపై చంద్రబాబు విసుర్లు

టీడీపీ అధినేత నారా చంద్రబాబు నాయుడు తణుకులో రైతు పోరుబాట కార్యక్రమంలో పాల్గొన్నారు. ఈ సందర్భంగా ఇరగవరం నుంచి తణుకు వరకు 12 కిలోమీటర్ల మేర పాదయాత్ర చేశారు. చంద్రబాబు దారి పొడవునా అకాల వర్షాల వల్ల నష్టపోయిన రైతులతో మాట్లాడారు. చంద్రబాబుకు రైతులు తమ కష్టాలు చెప్పుకున్నారు. ఈ సందర్భంగా చంద్రబాబు రైతులను ఉద్దేశించి ప్రసంగించారు.

చంద్రబాబు ప్రసంగం హైలైట్స్...

• ధాన్యంలో తేమ ఉన్నా, మొలక వచ్చినా కొంటాము అని ప్రకటన ఇచ్చారు. ఆ ధాన్యం కొన్నారా అని నేను అడుగుతున్నా
• మనం పంట అమ్మితే మనకు డబ్బులు ఇవ్వాలి. కానీ విచిత్రమైన పరిస్థితి ఏంటంటే... మన దగ్గర నుంచి డబ్బు వసూలు చేస్తున్నారు.
• లారీకి రూ.10 వేలు వసూలు చేస్తున్నారు.
• ఆర్బీకేల వల్ల రైతులకు ఏం లాభం వచ్చిందో చెప్పాలి. ఆర్బీకే కేంద్రాలు దగా కేంద్రాలు అయ్యాయి.

• ఈ సభ ద్వారా ఈ ప్రభుత్వాన్ని పలు ప్రశ్నలు అడుగుతున్నా
• అకాల వర్షాల వల్ల ఎంత నష్టం జరిగింది? ఎంత మంది రైతులు నష్టపోయారు? 4 లక్షల ఎకరాల్లో పంట దెబ్బతిన్నట్లు తెలుస్తోంది... ప్రభుత్వం ఎందుకు అధికారికంగా ప్రకటించడం లేదు?
• విపత్తులు వచ్చినప్పుడు ప్రత్యేకంగా జీవోలు ఇచ్చి సాయం చేస్తాం. కానీ ఈ ప్రభుత్వం ఈ అకాల వర్షాలకు ఎందుకు ప్రత్యేక ఉత్తర్వులు ఇచ్చి ఆదుకోలేదు?
• ఏప్రిల్ 1 వ తేదీన రబీ ధాన్యం సేకరించాలి. కానీ ఎందుకు ధాన్యం సేకరణ చేపట్టలేదు.?
• కేజీ చక్కెర కొంటే కేజీనే ఇస్తారు... కానీ ఇక్కడ ధాన్యం సంచికి 40 కేజీలకు 42 కేజీలు ఎందుకు తీసుకుంటున్నారు?
• తేమ, తరుగు, నూక పేరుతో అదనంగా డబ్బులు గుంజుతున్నారు. దీని వల్ల బస్తాకు రూ.200 నుంచి రూ. 300 పోతుంది. అంటే ఎకరానికి రూ.10 వేల నుంచి రూ.20 వేల నష్టం వస్తుంది. ప్రభుత్వం నాపై దాడి చేయడం కాదు. దీనికి సమాధానం చెప్పాలి

• చేతనైతే నాతో పోటీపడి రైతులకు సాయం చేయాలి కానీ నాపై విమర్శలు కాదు.
• నేటి ఈ పాదయాత్ర... వైసీపీ ప్రభుత్వానికి అంతిమ యాత్ర అవుతుంది.
• రైతుల పంటలకు బీమా అనేది ఎప్పటి నుంచో ఉంది. కానీ ఈ ప్రభుత్వం బీమా కట్టడం లేదు.
• ఈ ముఖ్యమంత్రి లేచింది మొదలు చెప్పేది అసత్యాలే. ఈ సీఎం కళ్లార్పకుండా అబద్ధాలు చెపుతాడు. ఒక్క బాబాయి కేసులోనే ఎన్ని అబద్ధాలు చెప్పాడో చూశాం.
• ఈ సమావేశం ద్వారా అడుగుతున్నా రబీకి ఇన్స్యూరెన్స్ కట్టారా... ఏ పొలంలో అయినా క్రాప్ కటింగ్ ఎక్సపెరిమెంట్ జరిగిందా ?

• ప్రభుత్వం ధాన్యం సేకరణలో రైతుల నుంచి వసూలు చేసిన మొత్తాన్ని రైతుకు తిరిగి ఇవ్వాలి.
• రవాణా ఖర్చులు, తరుగు, నూక పేరుతో వసూలు చేసిన మొత్తాలను రైతుకు చెల్లించాలి
• జగన్ కు అర్థం కాకపోవచ్చు... కానీ నేర్చుకోవాలనే ఆలోచన లేదు.
• ధాన్యం మొత్తం ప్రభుత్వమే కొనాలి... కొన్న ధాన్యానికి వెంటనే మద్దతు ధర రైతుకు చెల్లించాలి.

• మీ డబ్బులు ఇప్పించడానికి నేను సిద్దంగా ఉన్నా.....రైతులు కూడా నాతో కలిసి పోరాటానికి కదలిరావాలి.
• రైతాంగంలో ధైర్యం రావాలి... ఈ ప్రభుత్వం బెదిరిస్తుందని భయపడకండి. సమస్యలపై నిరసనలు తెలిపే హక్కు రాజ్యాంగం ప్రతి ఒక్కరికీ ఇచ్చింది.
• ఇక్కడ ఒక మంత్రి ఉన్నాడు... పోలీసులను పెట్టి రైతులను బెదిరించాడు, ఇలాంటి వాళ్లను నా జీవితంలో చాలా మందిని చూశా

• నేరస్తుడికి అధికారం ఇవ్వొద్దంటే నాడు మీరంతా వినలేదు, ఒక చాన్స్ అంటే కరిగిపోవద్దు అని నాడే చెప్పాను. ఒక్క చాన్స్ అని కరెంట్ తీగను పట్టుకుంటే ఏమవుతుంది... ఇప్పుడు అదే అయ్యింది.
• ఈ ప్రభుత్వానికి నాలుగు డిమాండ్లు పెడుతున్నాను.
• దెబ్బతిన్న మొక్కజొన్న, జొన్న, వరికి ఎకరానికి రూ.25 వేలు ఇవ్వాలి
• హార్టికల్చర్ పంటలకు ఎకరానికి రూ.50 వేలు ఇవ్వాలి
• ఇన్ స్యూరెన్స్ కట్టలేదు కాబట్టి... నష్టపరిహారం ప్రభుత్వమే ఇవ్వాలి.
• ఈ ప్రభుత్వం ఇచ్చే వరకు మనం పోరాడుదాం... ప్రభుత్వం అప్పటికీ ఇవ్వకపోతే...మన ప్రభుత్వం వచ్చిన తరువాత ఈ నష్టపరిహారం ఇస్తాం.

• ఇప్పుడు చుక్కల భూములు అంటున్నాడు... సర్వే అంటున్నాడు. ఈ విషయంలో కూడా అక్రమాలు జరుగుతున్నాయి. ప్రజలు అప్రమత్తంగా ఉండాలి.
• జగన్ కు పిచ్చి ముదిరింది... ఫ్రస్టేషన్ పీక్ కు వెళ్లింది.
• నేను రైతు వ్యతిరేకి అని జగన్ అంటున్నాడు... నేను 5 ఏళ్లు ఏం చేశానో.... నువ్వు ఏం చేశావో చర్చకు సిద్దమా ?
• నాడు మైక్రో ఇరిగేషన్ కు 90 శాతం సబ్సిడీ ఇచ్చాం....యంత్రాలు ఇచ్చాం....రైతులకు ట్రాక్టర్లు ఇచ్చాం.
• రైతుకు అండగా నిలిచినపార్టీ టీడీపీ... రైతును నిండాముంచిన పార్టీ వైసీపీ
• మళ్లీ జగన్ గెలిచేది లేదు... జగన్ పని అయిపోయింది.

• ఇక్కడ ఒక మంత్రి ఉన్నాడు...అతను ఎర్రిపప్ప. అంటే అర్థం బుజ్జినాన్న.
• ఇతను వెర్రిపప్పా... బుజ్జినాన్నా? మా అచ్చెన్న చెప్పినట్లు మొదటి ఎర్రిపప్ప తాడేపల్లిలో ఉన్నాడు... రెండో వెర్రిపప్ప ఇక్కడ ఉన్నాడు
• రైతులపై ప్రేమ ఉంటే వెంటనే జగన్ కారుమూరిని మంత్రిపదవి నుంచి తొలగించాలి
• మంత్రిగా ఉండి సొంత నియోజకవర్గంలో ధాన్యం కొనలేని మంత్రి మనపై విమర్శలు చేస్తున్నాడు

• 45 ఏళ్లుగా రాజకీయాల్లో ఉన్నా.... ఈ మంత్రులు నన్ను బెదిరిస్తారా?
• ఈ మంత్రి అనుకుంటే నేను తణుకు దాటనా... తీవ్ర వాదులతో పోరాడిన పార్టీ టీడీపీ. ఆకు రౌడీలకు భయపడతానా?
• రౌడీయిజం చేస్తున్న వైసీపీ నేతల తప్పులు అన్నీ లెక్క పెడుతున్నా... అన్నిటికీ బదులిస్తా.
• ఈ రోజు సభ నుంచి చెపుతున్నా... కౌలు రైతును ఆదుకునే బాధ్యత నేను తీసుకుంటా