Priyadarshi: ఇది మన గుండెకాయలాంటి సినిమా: 'బలగం' ఈవెంటులో దిల్ రాజు
- తెలంగాణ నేపథ్యంలో నడిచే కథగా 'బలగం'
- దిల్ రాజు బ్యానర్లో రూపొందిన సినిమా
- తమ సంస్థ నుంచి వస్తున్న మరో మంచి చిత్రమన్న దిల్ రాజు
- తాను పరిచయం చేస్తున్న పదో దర్శకుడు వేణు అని వెల్లడి
కమెడియన్ గా వేణు పలు చిత్రాలలో నటించాడు. ఆయన దర్శకుడిగా చేసిన తొలి ప్రయత్నమే 'బలగం' సినిమా. దిల్ రాజు ప్రొడక్షన్స్ బ్యానర్ లో నిర్మితమైన ఈ సినిమా, మార్చి 3వ తేదీన థియేటర్లకు రానుంది. ఈ నేపథ్యంలో 'సిరిసిల్ల'లో అభిమానుల సమక్షంలో ఈ సినిమా ప్రీ రిలీజ్ ఈవెంటును నిర్వహించారు.
ఈ వేదికపై దిల్ రాజు మాట్లాడుతూ .. "ముందుగా కేటీఆర్ గారికి ధన్యవాదాలు తెలియజేస్తున్నాను. సిరిసిల్లలో ఈ సినిమా షూటింగు జరగడానికి అంతా కూడా ఎంతో సహకరించారు. తెలంగాణ నేపథ్యంలో గతంలో వచ్చిన 'ఒసేయ్ రాములమ్మా' .. 'ఫిదా' వంటి సినిమాలు భారీ విజయాలను అందుకున్నాయి. అలాగే ఈ సినిమాకి కూడా ఆ స్థాయి ఆదరణ లభిస్తుందని భావిస్తున్నాను" అన్నారు.
' ఇది సిరిసిల్లలోని ఒక కుటుంబం చుట్టూ తిరిగే కథ. మా సంస్థ నుంచి పరిచయమవుతున్న పదో దర్శకుడు వేణు. ఈ సినిమాను తాను చాలా అద్భుతంగా ఆవిష్కరించాడు. 'బొమ్మరిల్లు' .. శతమానం భవతి' మాదిరిగా మా సంస్థకి మంచి పేరు తెస్తుందని ఆశిస్తున్నాను. ఒక్క మాటలో చెప్పాలంటే ఇది మన గుండెకాయ లాంటి సినిమా" అంటూ చెప్పుకొచ్చారు.
