Abhimanyu: 'ఎంసీఏ' రీమేక్ అక్కడ తేడా కొట్టేసింది!
- తెలుగులో హిట్ కొట్టిన 'ఎంసీఏ
- హిందీలో 'నికమ్మ' టైటిల్ తో రీమేక్
- నిన్ననే విడుదలైన సినిమా
- తొలి రోజునే ఫ్లాప్ టాక్
నాని హీరోగా దిల్ రాజు నిర్మాణంలో .. వేణు శ్రీరామ్ దర్శకత్వంలో 'మిడిల్ క్లాస్ అబ్బాయి' సినిమా రూపొందింది. నాని జోడీగా సాయిపల్లవి నటించిన ఈ సినిమాలో, ఆయన వదిన పాత్రలో భూమిక మెప్పించింది. 'నికమ్మ' టైటిల్ తో హిందీలో ఈ సినిమాను రీమేక్ చేశారు. అహ్మద్ ఖాన్ దర్శకనిర్మాతగా వ్యవహరించిన ఈ సినిమా నిన్ననే థియేటర్లకు వచ్చింది.
ఈ సినిమాలో నాని పాత్రలో అభిమన్యు దాసానీ .. సాయిపల్లవి పాత్రలో షిర్లే సెటియా .. భూమిక పాత్రలో శిల్పా శెట్టి నటించారు. తొలి రోజున దేశవ్యాప్తంగా 25 లక్షలు మాత్రమే వసూలు చేయగలిగిన ఈ సినిమా ఫ్లాప్ టాక్ ను మూటగట్టుకుంది. తెలుగులో మాదిరిగా సరైన ఆర్టిస్టులు పడకపోవడమే కారణమనే అభిప్రాయాలు వినిపిస్తున్నాయి.
తెలుగులో ఓ మరిది ఎలా ఉండాలో నాని అలాగే కనిపిస్తాడు. వదిన పాత్రలోని హుందాతనంతో ఆ పాత్రకి భూమిక ఒక నిండుదనాన్ని తీసుకొచ్చింది. ఇక సాయిపల్లవి యాక్టింగ్ గురించి ప్రత్యేకంగా చెప్పవలసిన పనే లేదు. ఆమె చేసిన పాత్రను గ్లామర్ గా కనిపించడం మాత్రమే తెలిసిన షిర్లేతో చేయించడం అతిపెద్ద మైనస్ గా చెప్పుకుంటున్నారు.
