biryani: రెస్టారెంట్లో చికెన్ బిర్యానీ తిని ర‌క్తం కక్కుకుని యువ‌కుడి మృతి
- నర్సంపేట ప‌ట్ట‌ణంలో ఘటన
- రెస్టారెంట్లో శాంపిల్స్ సేక‌రించిన అధికారులు
- యువ‌కుడి మృత‌దేహాన్ని పోస్టుమార్టం నిమిత్తం ఆసుప‌త్రికి త‌ర‌లింపు
ఓ రెస్టారెంట్లో చికెన్ బిర్యానీ తిన్న యువ‌కుడు ఆ వెంట‌నే ర‌క్తం కక్కుకుని మృతి చెందాడు. ఈ ఘ‌ట‌న‌పై పోలీసులు ద‌ర్యాప్తు జ‌రుపుతున్నారు. పూర్తి వివ‌రాల్లోకి వెళ్తే, ఈ ఘటన వరంగల్ గ్రామీణ జిల్లా నర్సంపేట ప‌ట్ట‌ణంలో చోటు చేసుకుంది. చెన్న‌రావుపేట మండ‌ల ప‌రిధిలోని బోడ తండా వాసి ప్ర‌సాద్(23) ఓ రెస్టారెంట్‌కు వెళ్లాడు. త‌న‌కు ఇష్ట‌మైన చికెన్ బిర్యానీ తిన్నాడు.
అయితే, రెస్టారెంట్ నుంచి బ‌య‌ట‌కు వ‌చ్చిన వెంట‌నే అతనికి వాంతులు వ‌చ్చాయి. ర‌క్తం కూడా నోట్లో నుంచి ప‌డ‌డంతో ఈ విష‌యాన్ని గుర్తించిన స్థానికులు పోలీసుల‌కు ఫోన్ చేశారు. పోలీసులు అక్క‌డ‌కు చేరుకుని వెంట‌నే ప్ర‌సాద్‌ను క‌మ్యూనిటీ హెల్త్ సెంట‌ర్‌కుతీసుకెళ్ల‌గా అప్ప‌టికే ప్ర‌సాద్ మృతి చెందిన‌ట్లు వైద్యులు తెలిపారు.
ఈ ఘ‌ట‌న‌పై ద‌ర్యాప్తు చేస్తున్నామ‌ని పోలీసులు చెప్పారు. మునిసిప‌ల్ అధికారులు రెస్టారెంటుకు చేరుకుని అక్క‌డి ఫుడ్ శాంపిల్స్‌ను సేక‌రించి ప‌రిశీలిస్తున్నారు. ప్ర‌సాద్ మృత‌దేహాన్ని పోస్టుమార్టం నిమిత్తం పోలీసులు ఆసుప‌త్రికి త‌ర‌లించారు. ఆయ‌న మృతికి గ‌ల కార‌ణాలు పోస్టుమార్టం నివేదిక‌లో వెల్ల‌డ‌య్యే అవ‌కాశం ఉంది.
