Tiger: అదృష్టవంతుడు... వెంటతరిమిన పులి వదిలేసింది!
- అసోంలో ఘటన
- పులి రాకతో గోతిలో దూకేసిన రైతు
- రైతుతో పాటే దూకేసిన పులి
పులి పంజా విసిరితే అది జంతువైనా, మనిషైనా బతికి బట్టకట్టడం అసాధ్యమని అంటారు. కానీ అసోంలో ఓ వ్యక్తి మాత్రం అదృష్టవశాత్తు బతికి బయటపడ్డాడు. బతుకుజీవుడా అంటూ ఊపిరి పీల్చుకున్నాడు. తేజ్ పూర్ సమీపంలోని వ్యవసాయ క్షేత్రాల్లోకి వచ్చిన పెద్దపులి స్థానికులను భయాందోళనలకు గురిచేసింది. వారిపై దాడికి యత్నించడంతో రైతులు తలో దిక్కుకు పరుగులు తీశారు.
వారిలో ఓ రైతును పులి వెంటతరమడమే కాదు పంజాతో కొట్టిచంపినంత పనిచేసింది. పులి వెంటపడడంతో ఆ వ్యక్తి పరుగులు తీసి ఓ గోతిలో దూకేశాడు. పులి కూడా అమాంతం అతనితో పాటే గోతిలోకి దూకేసింది. అయితే ఎందుకనో వెంటనే వెనక్కి వచ్చేసి ఇసుక దిబ్బలనెక్కి సమీపంలోని చెట్లలోకి మాయమైంది. ఈ ఘటన తాలూకు వీడియోను భారత అటవీశాఖ అధికారులు ట్విట్టర్ లో పంచుకున్నారు.
