Undavalli Sridevi: రోడ్డుపై క్షతగాత్రుడు... కారు దిగి చికిత్స చేసిన వైసీపీ మహిళా ఎమ్మెల్యే
- పిడుగురాళ్ల వద్ద బైక్ ప్రమాదం
- గాయాలపాలైన యువకుడు
- కరోనా భయంతో స్థానికుల వెనుకంజ
- అదే సమయంలో హైదరాబాద్ వెళుతున్న ఎమ్మెల్యే
గుంటూరు-హైదరాబాద్ రహదారిపై పిడుగురాళ్ల వద్ద ఓ క్షతగాత్రుడు రోడ్డుపై నిస్సహాయ స్థితిలో పడివుండగా, కరోనా భయాలను కూడా లెక్కచేయకుండా వైసీపీ మహిళా ఎమ్మెల్యే డాక్టర్ ఉండవల్లి శ్రీదేవి ప్రథమ చికిత్స చేశారు.
తాడికొండ ఎమ్మెల్యే ఉండవల్లి శ్రీదేవి హైదరాబాద్ వెళుతుండగా మార్గమధ్యంలో ఓ యువకుడు బైక్ యాక్సిడెంట్ లో గాయాలతో రోడ్డుపై పడి ఉండడం చూశారు. కరోనా భయంతో అతడికి సాయం చేసేందుకు స్థానికులెవరూ ముందుకు రాలేదు. అదే సమయానికి ఎమ్మెల్యే శ్రీదేవి ఆ మార్గంలో ప్రయాణిస్తుండడంతో ఈ దృశ్యం కంటబడింది. వెంటనే కారు ఆపిన ఆమె ఆ యువకుడికి ఫస్ట్ ఎయిడ్ చేసి, ఆపై 108కి, పోలీసులకు సమాచారం అందించారు. వారు వచ్చిన తర్వాత విషయం వివరించి, ఆపై హైదరాబాద్ పయనమయ్యారు.
