rbi: దేశంలో గత వందేళ్లలో ఎన్నడూ లేని సంక్షోభ పరిస్థితులు తలెత్తాయి: ఆర్బీఐ గవర్నర్
- దేశ వ్యాప్తంగా అసాధారణ పరిస్థితులు నెలకొన్నాయి
- ఉపాధి, ఇతర రంగాలపై కరోనా వైరస్‌ తీవ్ర ప్రభావం చూపింది
- ఆర్థిక వృద్ధి, స్థిరత్వానికి అధిక ప్రాధాన్యతనిస్తున్నాం
- కరోనా వల్ల తలెత్తే సంక్షోభాలను గుర్తిస్తున్నాం
కరోనా విజృంభణ కారణంగా దేశ వ్యాప్తంగా అసాధారణ పరిస్థితులు నెలకొన్నాయని, వందేళ్లలో ఎన్నడూ లేని సంక్షోభ పరిస్థితులు తలెత్తాయని భారతీయ రిజర్వు బ్యాంకు (ఆర్బీఐ) గవర్నర్ శక్తికాంతదాస్ అన్నారు. ఈ రోజు స్టేట్ బ్యాంక్ ఆఫ్ ఇండియా (ఎస్‌బీఐ) బ్యాంకింగ్‌, ఎకనమిక్స్ కాన్‌క్లేవ్‌లో వీడియో కాన్ఫరెన్స్ ద్వారా పాల్గొన్న ఆయన ఈ సందర్భంగా ప్రసంగించారు.
దేశంలో ఆర్థిక స్థిరత్వానికి అనేక చర్యలు చేపట్టామని శక్తికాంత దాస్ వివరించారు. ఉపాధి, ఇతర రంగాలపై కరోనా వైరస్‌ తీవ్ర ప్రభావం చూపిందని చెప్పారు. ఈ నేపథ్యంలో ఆర్థిక వృద్ధి, స్థిరత్వానికి అధిక ప్రాధాన్యతనిస్తున్నామని తెలిపారు. కరోనా వల్ల తలెత్తే అవకాశమున్న సంక్షోభాలను గుర్తించి అవి రాకుండా చేయడానికి ప్రణాళికలు వేసుకుంటున్నట్లు చెప్పారు. అన్ని సంప్రదాయ, అసాధారణ చర్యలు తీసుకుంటూ మార్కెట్‌ తిరిగి పుంజుకునేలా చర్యలు తీసుకుంటున్నట్లు తెలిపారు.
