Smoking: ధూమపాన ప్రియులకు ముప్పే.. తేల్చిన కరోనా అధ్యయనం!
- దక్షిణ కాలిఫోర్నియా యూనివర్సిటీ అధ్యయనంలో వెల్లడి
- ఆర్ఎన్ఏ డేటా విశ్లేషణ
- ఊపిరితిత్తుల కణజాలాల్లో వైరస్ సోకుతుందని తేలిన వైనం
ధూమపాన ప్రియుల్లో కరోనా ముప్పు ఎక్కువని అమెరికాలోని దక్షిణ కాలిఫోర్నియా యూనివర్సిటీ నిర్వహించిన అధ్యయనంలో వెల్లడైంది. మిగతా వారితో పోలిస్తే వీరు తొందరగా కరోనా వైరస్ బారినపడతారని తేలింది. ఈ పరిశోధన కోసం శాస్త్రవేత్తలు పొగతాగిన వారి, తాగని వారి ఊపిరితిత్తుల కణజాలాల్లో ఉన్న రైబోన్యూక్లిక్ యాసిడ్ (ఆర్ఎన్ఏ) డేటాను విశ్లేషించారు.
ఈ సందర్భంగా శ్వాస మార్గంలోని వైరల్‌ ఇన్ఫెక్షన్‌కు గురయ్యే ఏసీఈ2, ఫ్యూరిన్‌, టీఎంపీఆర్‌ఎస్ ఎస్‌2 కణజాలాలను క్షుణ్ణంగా పరిశీలించారు. ఈ సందర్భంగా తేలిందేమిటంటే.. అసలు పొగతాగని వారితో పోలిస్తే తక్కువలో తక్కువగా 100 సిగరెట్లు తాగిన వారి ఊపిరితిత్తుల కణజాలలు వైరస్ బారినపడే అవకాశం 25 శాతం ఎక్కువగా ఉందని గుర్తించారు. ఇది ధూమపాన ప్రియులకు హెచ్చరిక వంటిదేనని ఈ సందర్భంగా అధ్యయనకారులు తెలిపారు.
