Kurnool District: మహిళా ఓటరు పేరుకి సినీ నటుడు వెంకటేశ్ ఫొటో.. కర్నూలు కార్పొరేషన్ ఓటర్ల లిస్టులో విచిత్రం!
- ఎన్నికల కోసం సిద్ధమవుతున్న కర్నూలు అధికారులు
- ఓటరు జాబితా విడుదల చేసి అభాసుపాలు
- తప్పుల కుప్పలుగా ఓటర్ల జాబితా
స్థానిక సంస్థల ఎన్నికల కోసం సిద్ధమవుతున్న కర్నూలు నగర పాలక సంస్థ అధికారులు అందులో భాగంగా ఓటరు జాబితాను విడుదల చేసి అభాసుపాలయ్యారు. టాలీవుడ్ అగ్రనటుడు వెంకటేశ్ ఫొటోను ఓ మహిళ ఫొటోకు బదులుగా వాడేసి విమర్శలు కొనితెచ్చుకున్నారు. రాణి కూమారోలూ అనే 20 ఏళ్ల యువతి ఫొటోకు బదులుగా వెంకటేశ్ ఫొటో అచ్చయింది.
దీనిని ఏమాత్రం గుర్తించని అధికారులు ఆ జాబితాను అలానే విడుదల చేసేశారు. ఇదొక్కటే కాదు, ఇలాంటి తప్పులు చాలానే ఉన్నాయని ఓటర్లు ఆగ్రహం వ్యక్తం చేస్తున్నారు. విషయం అధికారుల దృష్టికి చేరడంతో ఎన్నికలకు ఇంకా సమయం ఉందని, కాబట్టి తప్పులను సరిచేసి కొత్త జాబితాను విడుదల చేస్తామని అంటున్నారు.
