two heads snake: రెండు తలల పాము... బేరం రూ.13 లక్షలు!
- అక్రమంగా తరలిస్తుండగా పట్టుకున్న పోలీసులు
- నిందితులు గుల్బర్గాకు చెందిన వారు
- కొనుగోలుదారుడు హైదరాబాద్ వాసి
పాము కనిపిస్తే చంపేస్తాం. కాదంటే పట్టుకుని అటవీ ప్రాంతంలో వదిలేస్తాం. అంతకంటే ఎక్కువ ప్రాధాన్యత జనారణ్యంలో కనిపించదు. కానీ ఆ రెండు తలల పాము లక్షలు కురిపించే బ్యాంక్ ఏటీఎం లాంటిదంటే నమ్ముతారా? అమ్మకానికి ఉంచిన ఈ పామును కొనుగోలుదారునికి అప్పగించేందుకు ప్రయాణిస్తున్న ముఠాను పోలీసులు రంగారెడ్డి జిల్లా చేవెళ్ల వద్ద నిఘావేసి పట్టుకున్నారు.
పోలీసుల కథనం మేరకు వివరాల్లోకి వెళితే... కర్ణాటక రాష్ట్రం గుల్బర్గాకు చెందిన అసత్, ముజాయిద్, ఖదీర్ వద్ద ఓ రెండు తలలపాము ఉంది. దీన్ని హైదరాబాద్ కు చెందిన వ్యక్తికి అమ్మేందుకు రూ.13 లక్షలకు ఒప్పందం కుదుర్చుకున్నారు.
అనంతరం పామును అప్పగించేందుకు వస్తుండగా విశ్వసనీయంగా అందిన సమాచారం మేరకు ఓఎన్టీ పోలీసులు బీజాపూర్ రహదారిపై కాపుకాశారు. చేవెళ్ల పట్టణంలోని ఓ దాబాకు వచ్చిన నిందితులను పట్టుకుని పామును స్వాధీనం చేసుకున్నారు.
