Vijayawada: విజయవాడలో స్టాఫ్‌నర్స్‌పై అత్యాచారం.. నిందితుడి కోసం పోలీసుల గాలింపు
- గత నెల 4న ఘటన
బాధితురాలి అన్నను చంపేస్తానని బెదిరింపు
ఆత్మహత్యాయత్నంతో వెలుగులోకి
విజయవాడలో ఓ కార్పొరేట్ ఆసుపత్రి స్టాఫ్‌నర్స్‌పై గత నెలలో జరిగిన అత్యాచారం ఘటన ఆలస్యంగా వెలుగులోకి వచ్చింది. ప్రస్తుతం పరారీలో ఉన్న నిందితుడి కోసం పోలీసులు గాలిస్తున్నారు. వారి కథనం ప్రకారం.. నగరంలోని ఓ ఆసుపత్రిలో స్టాఫ్ నర్స్‌గా పనిచేస్తున్న మొవ్వకు చెందిన యువతి తన సోదరుడితో కలిసి గుణదలలో ఉంటోంది. కారు డ్రైవర్‌గా పనిచేస్తున్న వినోద్ అనే యువకుడు గత నెల 4న ఆమె ఇంట్లోనే అత్యాచారానికి పాల్పడ్డాడు.
ఆపై ఈ విషయాన్ని బయటకు చెబితే ఆమె అన్నను చంపేస్తానని బెదిరించాడు. అంతేకాదు, అత్యాచార ఘటనకు సంబంధించిన ఫొటోలు సోషల్ మీడియాలో పెడతానని బెదిరించాడు. దీంతో తీవ్ర మనస్తాపానికి గురైన యువతి ఈ నెల 26న ఆత్మహత్యాయత్నానికి పాల్పడింది. గమనించిన చుట్టుపక్కల వారు ఆమెను కాపాడి ఆసుపత్రికి తరలించారు. ఆత్మహత్యాయత్నానికి గల కారణాలు ఆరా తీయగా అసలు విషయం బయటకొచ్చింది. ఆమె ఫిర్యాదుపై కేసు నమోదు చేసుకున్న పోలీసులు పరారీలో ఉన్న నిందితుడి కోసం గాలిస్తున్నారు.
