Andhra Pradesh: ఇప్పుడు అమరావతి ప్రాంతంలో వెళుతుంటే శ్మశానంలో నడుస్తున్నట్లు ఉంది!: కోడెల శివప్రసాద్
- పెట్టుబడులు, లక్షల ఉద్యోగాలు పోయాయి
- అమరావతి తెలుగు ప్రజల ఆకాంక్ష
- రాజధానిని మార్చాలనుకోవడం సరికాదు
ఆంధ్రప్రదేశ్ రాజధాని అమరావతిని మార్చే దిశగా ఏపీ ప్రభుత్వం ఆలోచన చేస్తోందని టీడీపీ నేత కోడెల శివప్రసాద్ తెలిపారు. ఇది ఎంతమాత్రం సరికాదని వ్యాఖ్యానించారు. ఈ విషయంలో జగన్ ప్రభుత్వం ఏకపక్ష నిర్ణయాలు తీసుకోరాదని సూచించారు. రాజధాని తరలింపు, విద్యుత్ పీపీఏ ఒప్పందాల సమీక్ష, పోలవరం పనుల నిలుపుదల, రివర్స్ టెండరింగ్ వంటి పనులు చేయడానికి 5 కోట్ల మంది ఏపీ ప్రజలు జగన్ కు అధికారం ఇవ్వలేదని గుర్తుచేశారు.
నమ్మి ఓటేసిన ప్రజలకు నిర్మాణాత్మకమైన పరిపాలన అందించాలని సూచించారు. కేంద్రం వద్దంటున్నా, ప్రైవేటు పెట్టుబడిదారులు వద్దని చెబుతున్నా ఈ విషయాల్లో రాష్ట్ర ప్రభుత్వం ఏకపక్షంగా వ్యవహరిస్తోందని ఆగ్రహం వ్యక్తం చేశారు. అమరావతి అన్నది తెలుగు ప్రజల ఆకాంక్ష అనీ, కల అని కోడెల శివప్రసాద్ తెలిపారు.
దాన్ని నిర్వీర్యం చేయవద్దని కోరారు. ఇప్పుడు అమరావతి ప్రాంతానికి వెళితే ఓ శ్మశానంలో నడిచినట్లు ఉందని ఆవేదన వ్యక్తం చేశారు. పండుగ సందర్భంగా కళకళలాడే ప్రాంతంలాగా ఉన్న అమరావతి ఇప్పుడు శ్మశానంలాగా మారిపోయిందని చెప్పారు. లక్షల సంఖ్యలో ఉద్యోగాలతో పాటు పెట్టుబడులు, బ్యాంకుల రుణాలు వెనక్కి వెళ్లిపోయాయని విచారం వ్యక్తం చేశారు.
