Article 370: కండబలంతో ఆర్టికల్ 370ని రద్దు చేసిన వారికి చరిత్ర గురించి ఏం తెలుసు?: చిదంబరం
- ముస్లింలు ఎక్కువగా ఉన్నారనే ఆర్టికల్ 370ని రద్దు చేశారు
- కశ్మీర్ లో హిందువులు ఎక్కువగా ఉంటే దాని జోలికి వెళ్లేవారు కాదు
- ఆర్టికల్ రద్దుకు ఏడు పార్టీలు మద్దతివ్వడం బాధించింది
మోదీ ప్రభుత్వం కండబలంతో ఆర్టికల్ 370ని రద్దు చేసిందని కాంగ్రెస్ నేత, కేంద్ర మాజీ మంత్రి చిదంబరం మండిపడ్డారు. ఆ పని చేసిన వారికి 72 ఏళ్ల చరిత్ర తెలియదని అన్నారు. జమ్ముకశ్మీర్ ఎప్పటికీ భారత్ లో అంతర్భాగమేనని చెప్పారు. ఈ విషయంలో ఏవైనా అనుమానాలు ఉంటే అవి బీజేపీకే ఉండాలని అన్నారు. కశ్మీర్ లో ముస్లింల సంఖ్య ఎక్కువగా ఉండటం వల్లే ఆర్టికల్ 370ని బీజేపీ ప్రభుత్వం రద్దు చేసిందని... ఆ రాష్ట్రంలో హిందువుల సంఖ్య ఎక్కువగా ఉన్నట్టైతే రద్దు చేసేది కాదని చెప్పారు. తమిళనాడును కేంద్రపాలిత ప్రాంతంగా చేస్తే... తమిళులు చూస్తూ ఉండిపోతారా? అని ప్రశ్నించారు. ఆర్టికల్ 370 రద్దుకు ఏడు పార్టీలు మద్దతును ప్రకటించడం తనను బాధించిందని చెప్పారు.
