Chris Gayle: పాకిస్థాన్ ఆశాకిరణానికి చుక్కలు చూపించిన గేల్
- గ్లోబల్ టి20 లీగ్ లో కొనసాగుతున్న గేల్ విధ్వంసం
- వాంకోవర్ జట్టుకు ప్రాతినిధ్యం వహిస్తున్న గేల్
- ఎడ్మంటన్ రాయల్స్ పై 44 బంతుల్లో 94 పరుగులు
కెనడాలో జరుగుతున్న గ్లోబల్ టి20 లీగ్ లో విండీస్ విధ్వంసక ఆటగాడు క్రిస్ గేల్ మెరుపులు కొనసాగుతున్నాయి. మొన్నటికి మొన్న హేమాహేమీలున్న ఓ జట్టును పసికూనలా మార్చేసి పరుగుల సునామీ సృష్టించిన గేల్ మరోసారి తన దూకుడు రుచిచూపించాడు. గేల్ పవర్ కు ఈసారి పాకిస్థాన్ వండర్ కిడ్ షాదాబ్ ఖాన్ ఒకే ఓవర్లో 32 పరుగులు సమర్పించుకోవాల్సి వచ్చింది.
ఈ లీగ్ లో వాంకోవర్ జట్టుకు ప్రాతినిధ్యం వహిస్తున్న గేల్ ఎడ్మంటన్ రాయల్స్ తో మ్యాచ్ లో ఆకాశమే హద్దుగా చెలరేగిపోయాడు. కేవలం 44 బంతుల్లో 94 పరుగులు సాధించాడు. అతడి స్కోరులో 6 ఫోర్లు, 9 సిక్సులున్నాయి. పాకిస్థాన్ ఆశాకిరణంగా భావిస్తున్న 20 ఏళ్ల యువ స్పిన్నర్ షాదాబ్ ఖాన్ వేసిన ఓ ఓవర్లో తొలి రెండు బంతుల్ని భారీ సిక్సర్లుగా మలిచిన గేల్ ఆపై రెండు బంతులకు ఫోర్లు కొట్టాడు. మళ్లీ చివరి రెండు బంతులను స్టేడియం బయటకు కొట్టి ఆ ఓవర్లో మొత్తం 32 పరుగులు పిండుకున్నాడు.
గేల్ విజృంభణతో 166 పరుగుల విజయలక్ష్యాన్ని వాంకోవర్ జట్టు 16.3 ఓవర్లలోనే అందుకుంది. 48 బంతుల్లో 59 పరుగులు కావాల్సిన స్థితిలో గేల్ ఒక్క ఓవర్ తో మ్యాచ్ స్వరూపాన్నే మార్చివేశాడు.
