Sirisilla: ఐపీఎల్ బెట్టింగ్‌కు పాల్పడుతున్న 15 మంది అరెస్ట్
- సిరిసిల్ల జిల్లా కేంద్రంలో బెట్టింగ్
- పక్కా సమాచారంతో దాడులు
- గూగుల్ పే యాప్ ద్వారా లావాదేవీలు
ఐపీఎల్ బెట్టింగ్‌కు పాల్పడుతున్న 15 మందిని రాజన్న సిరిసిల్ల జిల్లాలో పోలీసులు అదుపులోకి తీసుకుని కేసులు నమోదు చేశారు. ఈ కేసుకు సంబంధించిన వివరాలను డీఎస్పీ వెంకట రమణ మీడియాకు తెలిపారు. నేడు చెన్నై సూపర్ కింగ్స్, సన్ రైజర్స్ హైదరాబాద్ జట్ల మధ్య జరుగుతున్న మ్యాచ్‌పై బెట్టింగ్‌లకు పాల్పడుతున్నట్టు తెలిసిందన్నారు.
సిరిసిల్ల జిల్లా కేంద్రంలోని ప్రభుత్వ జూనియర్ కళాశాల మైదానంలో ఈ బెట్టింగ్ జరుగుతోందన్న పక్కా సమాచారంతో దాడులు నిర్వహించామని తెలిపారు. వీరు గూగుల్ పే యాప్ ద్వారా డబ్బు లావాదేవీలు నిర్వహిస్తున్నట్టు విచారణలో వెల్లడైందని డీఎస్పీ తెలిపారు. అదుపులోకి తీసుకున్న వారి నుంచి రూ.7500 నగదు, 18 సెల్‌ఫోన్లు స్వాధీనం చేసుకున్నట్టు తెలిపారు.
