manmohan singh: ‘మన్మోహన్ సింగ్’పై రూపొందిన సినిమా ట్రైలర్ విడుదల.. మండిపడుతున్న కాంగ్రెస్ నేతలు!
- యాక్సిడెంటల్ ప్రైమ్ మినిస్టర్ ట్రైలర్ రిలీజ్
- సోనియా, రాహుల్ కు వ్యతిరేకంగా ఉందన్న కాంగ్రెస్
- ఆ సీన్లు తొలగించకుంటే అడ్డుకుంటామని వార్నింగ్
మాజీ ప్రధాని, కాంగ్రెస్ నేత మన్మోహన్ సింగ్ జీవితంపై ‘ది యాక్సిడెంటల్ ప్రైమ్ మినిస్టర్’ పేరుతో సినిమా తెరకెక్కిన సంగతి తెలిసిందే. అనుపమ్ ఖేర్ మన్మోహన్ పాత్రలో నటించిన ఈ సినిమాను జనవరి 11న విడుదల చేసేందుకు నిర్మాతలు సన్నాహాలు చేసుకుంటున్నారు. అయితే ఈ సినిమా ట్రైలర్ నిన్న విడుదల కావడంతో ఒక్కసారిగా కలకలం చెలరేగింది. ఈ సినిమాలో సోనియా గాంధీ, రాహుల్ గాంధీలను నెగటివ్ షేడ్స్ లో చూపించారంటూ కాంగ్రెస్ నేతలు ఆగ్రహం వ్యక్తం చేస్తున్నారు.
యూపీఏ ప్రభుత్వ హయాంలో కుదుర్చుకున్న అణు ఒప్పందం, ఓ దశలో మన్మోహన్ రాజీనామాకు సిద్ధపడటం సహా పలు అంశాలను ఈ సినిమాలో చూపించారు. అయితే ఈ సినిమాలో వాస్తవాలను వక్రీకరించేలా సన్నివేశాలు ఉన్నాయని మహారాష్ట్ర యూత్‌ కాంగ్రెస్ నేతలు ఆరోపిస్తున్నారు.
ఇందులో ఎలాంటి అభ్యంతరకరమైన సన్నివేశాలు లేవని ధ్రువీకరించేందుకు ఈ సినిమా ప్రదర్శనను ఏర్పాటు చేయాలని డిమాండ్ చేశారు. తమ కార్యవర్గ సభ్యులకు సినిమాను ముందుగా ప్రదర్శించి అవసరమైన మార్పులు చేయకుంటే దేశమంతటా ‘యాక్సిడెంటల్ ప్రైమ్ మినిస్టర్’ చిత్రాన్ని అడ్డుకుంటామని హెచ్చరించారు.
