vijay devarakonda: విజయ్ దేవరకొండ నెక్స్ట్ మూవీగా 'డియర్ కామ్రేడ్'
- విడుదలకు ముస్తాబవుతోన్న 'టాక్సీవాలా'
- ముగింపు దశలో పరశురామ్ మూవీ
- భరత్ కమ్మతో సెట్స్ పైకి
విజయ్ దేవరకొండ చేతిలో అరడజనుకు పైగా సినిమాలు వున్నాయి. వాటిని వరుసగా పూర్తిచేసే పనిలో ఆయన బిజీగా వున్నాడు. ఆయన ముఖ్యమైన పాత్రను పోషించిన 'మహానటి' రేపు ప్రేక్షకుల ముందుకు రానుంది. ఈ సినిమా తరువాత 'టాక్సీవాలా'ను విడుదలకి సిద్ధం చేస్తున్నాడు. ఇక పరశురామ్ దర్శకత్వంలో చేస్తోన్న సినిమా కూడా చిత్రీకరణను పూర్తి చేసుకుంటోంది.
ఈ నేపథ్యంలో ముందుగా ప్లాన్ చేసుకున్న ప్రకారమే భరత్ కమ్మ అనే దర్శకుడితో కలిసి త్వరలో సెట్స్ పైకి వెళ్లడానికి రెడీ అవుతున్నాడు. ఈ సినిమాకి 'డియర్ కామ్రేడ్' అనే టైటిల్ ను ఖరారు చేశారు. టైటిల్ తోనే ఈ సినిమా ఆసక్తిని రేకెత్తిస్తోందని చెప్పొచ్చు. ఈ సినిమా కోసం కొత్త అమ్మాయిని కథానాయికగా తీసుకోనున్నట్టు సమాచారం. 'అర్జున్ రెడ్డి' సినిమాలో పాత్ర మేరకు తెలంగాణ యాసలో మాట్లాడిన విజయ్ దేవరకొండ, ఈ సినిమాలో ఆంధ్రలోని ఒక ప్రాంతానికి చెందిన యాసను మాట్లాడనున్నట్టు తెలుస్తోంది.
