charan: చిట్టిబాబును కొత్తగా చూపిస్తాను .. 'రంగస్థలం' సీక్వెల్ గురించి సుకుమార్
- ప్రేక్షకులకు చేరువైన చిట్టిబాబు పాత్ర
- చరణ్ నటనకు ప్రశంసలు
- సీక్వెల్ ఆలోచనలో సుకుమార్
'రంగస్థలం' విడుదల రోజునే హిట్ టాక్ తెచ్చుకుంది. చరణ్ ఇంతవరకూ చేసిన సినిమాలకి ఇది భిన్నమని ప్రేక్షకులు అంటున్నారు. సుకుమార్ ఇంతవరకూ చేసిన సినిమాల్లో ఇది ప్రత్యేకమని చెబుతున్నారు. 'చిట్టిబాబు' పాత్రలో చరణ్ జీవించాడనీ, తెరపై ఈ పాత్ర తప్ప చరణ్ కనిపించలేదనే అభిప్రాయాలు వ్యక్తమవుతున్నాయి. ఈ పాత్రను సుకుమార్ తీర్చిదిద్దిన తీరు అపూర్వమని కితాబునిస్తున్నారు.
తాజాగా ఈ సినిమా గురించి సుకుమార్ మాట్లాడుతూ .. జనానికి ఇంతగా దగ్గరైన చిట్టిబాబు పాత్రను ఇంతటితోనే వదిలేయదలచుకోలేదని చెప్పాడు. ఈ పాత్రను కొనసాగించే ఆలోచన చేస్తున్నానంటూ సీక్వెల్ గురించిన ఆలోచనను బయటపెట్టాడు. సీక్వెల్ చేస్తే అందులో చిట్టిబాబును కొత్తగా చూపిస్తాననీ, చెవికి ఆపరేషన్ చేయించుకుని మాటలు వినగలిగే చిట్టిబాబును చూస్తారని చెప్పాడు. మరి ఈ సినిమా సీక్వెల్ కి చరణ్ ఏమంటాడో .. అదెప్పుడు కార్యరూపాన్ని దాలుస్తుందో చూడాలి.
