2 countries: ‘2 కంట్రీస్’ సినిమా టీజర్ ను విడుదల చేసిన పవన్ కల్యాణ్!
- సునీల్ హీరోగా ‘2 కంట్రీస్’ సినిమా
- మళ్లీ మళ్లీ చూడాలనిపించేలా ఈ టీజర్ ఉంది: పవన్
- టీజర్ను ప్రశంసించిన ప‌వ‌న్‌కు జీవితాంతం రుణపడి ఉంటా: సునీల్
టాలీవుడ్‌లో హాస్య‌న‌టుడిగా మంచి గుర్తింపు తెచ్చుకున్న సునీల్.. ప్రస్తుతం క‌థ‌నాయ‌కుడి పాత్ర‌ల్లో న‌టిస్తూ అల‌రిస్తోన్న విష‌యం తెలిసిందే. ప్రస్తుతం ఆయ‌న చేతిలో ‘2 కంట్రీస్’ చిత్రం ఉంది. మల‌యాళంలో దిలీప్, మమతా మోహన్ దాస్ జంటగా తెరకెక్కిన 2 కంట్రీస్ అనే చిత్రానికి ఇది తెలుగు రీమేక్ వెర్షన్. దీనిని ప్రముఖ దర్శకుడు ఎన్. శంకర్ స్వీయ దర్శకత్వంలో నిర్మిస్తున్నారు.
ఈ సినిమా టీజర్ను సినీన‌టుడు పవన్ కల్యాణ్ ఈ రోజు విడుదల చేశారు. ఈ సంద‌ర్భంగా పవన్ కల్యాణ్ మాట్లాడుతూ... త‌న చేతుల మీదుగా ఈ సినిమా టీజర్ ను విడుదల చేయడం చాలా సంతోషంగా ఉందన్నారు. మళ్లీ మళ్లీ చూడాలనిపించేలా ఈ టీజర్ ఉందని వ్యాఖ్యానించారు. టీజర్‌లానే సినిమా ఉంటుందని ఆశిస్తున్న‌ట్లు తెలిపారు.
ఈ టీజర్ను తాను ఆదరించినట్టే ప్రేక్షకులందరూ ఆదరించాలని కోరుకుంటున్నానని పవన్ అన్నారు. ఈ సంద‌ర్భంగా సునీల్ మాట్లాడుతూ.. పవన్‌కల్యాణ్ త‌న సినిమా టీజర్ను విడుదల చేయడం ప‌ట్ల హ‌ర్షం వ్య‌క్తం చేశారు. ఈ టీజర్ను ప్రశంసించిన ఆయనకు జీవితాంతం రుణపడి ఉంటానని వ్యాఖ్యానించారు. ఎన్ కౌంటర్, భద్రాచలం, శ్రీరాములయ్య వంటి సినిమాల‌తో మంచి గుర్తింపు తెచ్చుకున్న ఎన్ శంకర్ ఈ సినిమాకు ద‌ర్శ‌కత్వం వ‌హిస్తున్నారు. ఇందులో మనీషా రాజ్.. సునీల్ స‌ర‌స‌న న‌టిస్తోంది. ఈ సినిమాను మహాలక్ష్మి ఆర్ట్స్‌ సంస్థ నిర్మిస్తోంది.
