vaema: అదంతా పుకారే .. 'శివ' సినిమాకి సీక్వెల్ కాదు : రామ్ గోపాల్ వర్మ
- నాగ్ - వర్మల కాంబినేషన్ లో సినిమా
- 'శివ' కి సీక్వెల్ అంటూ ప్రచారం
- ఈ విషయంపై స్పందించిన వర్మ
- అంచనాలకి మించి ఉంటుందంటూ వివరణ
నాగార్జున .. రామ్ గోపాల్ వర్మ కాంబినేషన్లో గతంలో వచ్చిన 'శివ' సంచలన విజయాన్ని సాధించింది. తెలుగు తెరపై చాలా కాలం పాటు ఆ ట్రెండ్ కొనసాగేంతగా ఆ సినిమా ప్రభావం చూపింది. ఆ తరువాత నాగ్ - వర్మ కాంబినేషన్లో 'అంతం', 'గోవిందా గోవిందా' సినిమాలు వచ్చినా, అవి పెద్దగా ఆకట్టుకోలేకపోయాయి. మళ్లీ ఇన్నాళ్లకు ఈ ఇద్దరూ కలిసి సెట్స్ పైకి వెళ్లడానికి రెడీ అవుతున్నారు. ఈ సినిమా షూటింగును ఈ నెల 20వ తేదీన ప్రారంభించనున్నట్టు వర్మ సోషల్ మీడియా ద్వారా తెలియజేశాడు.
అయితే ఈ సినిమా 'శివ'కి సీక్వెల్ అనే ప్రచారం జరుగుతోంది. ఈ ప్రచారం పట్ల వర్మ స్పందిస్తూ .. ఇది 'శివ' సినిమాకి సీక్వెల్ కాదని చెప్పేశాడు. 'శివ' కథకు .. ఈ కథకు .. అందులోని నాగ్ పాత్రకు .. ఇందులోని నాగ్ పాత్రకు అసలు పోలికే ఉండదని అన్నాడు. ఇది కొత్త కథతో తెరకెక్కుతుందనీ .. ఇంతవరకూ ఈ తరహా పాత్రలో మీరు నాగ్ ను చూసి వుండరని చెప్పాడు. నాగ్ అభిమానుల అంచనాలకి మించి ఈ సినిమా వుంటుందనే విషయాన్ని స్పష్టం చేశాడు.
