: బాధగా ఉన్నా ఈ మాట చెబుతున్నా... బీజేపీ ఇక నా పార్టీ కాదు!: వెంకయ్యనాయుడు
ఎన్నో దశాబ్దాలుగా తల్లిగా భావిస్తూ వచ్చిన భారతీయ జనతా పార్టీ, ఇక తన పార్టీ కాదని చెప్పేందుకు బాధపడుతున్నానని ఉప రాష్ట్రపతి అభ్యర్థి వెంకయ్యనాయుడు వ్యాఖ్యానించారు. ఈ ఉదయం నామినేషన్ వేసిన అనంతరం మీడియాతో మాట్లాడిన వెంకయ్య, బీజేపీని వదిలినందుకు ఓ వైపు బాధపడుతూనే, భారత రాజ్యాంగాన్ని కాపాడే బాధ్యతలను తలపైకి ఎత్తుకుంటున్నందుకు ఆనందంగానే ఉందని అన్నారు. ఇప్పుడు తాను ఏ పార్టీకీ చెందిన వ్యక్తిని కాదని, రాజకీయ పార్టీలకు అతీతంగా, తన జీవితంలో సెకండ్ ఇన్నింగ్స్ ను ప్రారంభించాల్సిన సమయం వచ్చిందని అన్నారు.
ఉప రాష్ట్రపతి బాధ్యతలు ఎలాంటివో, వాటిని ఎలా నిర్వర్తించాలో, భారత సంప్రదాయాలను ఎలా కాపాడాలో తనకు తెలుసునని, తాను ఈ పదవికి ఎంపికైతే, పక్షపాతాలు చూపించకుండా వ్యవహరిస్తానని, పదవికే వన్నె తెచ్చే ప్రయత్నం చేస్తానని అన్నారు. గతంలో ఉప రాష్ట్రపతులుగా పనిచేసిన వారి అడుగు జాడల్లో నడుస్తానని వెంకయ్యనాయుడు వెల్లడించారు. పార్లమెంటులో ప్రజాస్వామ్యాన్ని కాపాడేందుకు తన శాయశక్తులా ప్రయత్నిస్తానని తెలిపారు.
