: ముస్లిం విద్యార్థులను నపుంసకులుగా మార్చేందుకు స్కూళ్లలో టీకాలు ఇస్తున్నారని వదంతులు.. పాఠశాలలు మానేసిన విద్యార్థులు
ముస్లిం విద్యార్థులను నపుంసకులుగా మార్చేందుకు స్కూళ్లలో టీకాలు ఇస్తున్నార‌న్న వదంతులు వ్యాప్తి చెంద‌డంతో భ‌య‌ప‌డిపోయిన విద్యార్థుల తల్లిదండ్రులు తమ పిల్లలను పాఠ‌శాల‌ల‌కు పంప‌కుండా ఇంట్లోనే ఉంచేస్తోన్న సంఘ‌ట‌న‌లు అసోంలోని గౌహతిలో జ‌రుగుతున్నాయి. దీంతో ప్ర‌భుత్వ పాఠశాలల్లో గ‌త‌నాలుగు రోజులుగా విద్యార్థుల హాజ‌రు శాతం ఏకంగా 10 శాతానికి ప‌డిపోయింది. ఈ విషయంపై ఆయా పాఠశాలల ప్ర‌ధానోపాధ్యాయుల‌ను మీడియా సంప్ర‌దించ‌గా అస‌లు తమ పాఠశాలల్లో విద్యార్థులకు ఎలాంటి టీకాలు ఇప్పించడం లేదని తేల్చి చెప్పారు. ఇవ‌న్నీ వ‌దంతులేన‌ని, ఈ విషయమై తాము విద్యార్థుల తల్లిదండ్రులకు తెలుపుతున్నామ‌ని, దీంతోనే కొద్ది మంది పిల్ల‌ల‌యినా స్కూళ్ల‌కు వ‌స్తున్నార‌ని చెప్పారు.
ఈ వదంతులు మొద‌టి సారిగా ఈ నెల 16న వ్యాపించాయి. పీఠ్ మిడిల్‌ ఇంగ్లిష్‌ స్కూల్ హెడ్‌ మాస్టర్‌ ఇస్మాయిల్‌ హుస్సేన్ తెలిపిన వివ‌రాల ప్ర‌కారం... తమ పాఠ‌శాల‌లో మే 16వ తేదీన ఉద‌యం 9 గంటలకు ప్రార్థన జరిగిందని, విద్యార్థులు తరగతి గదులకు వెళ్లి పోయారని తెలిపారు. అదే రోజు 11 గంటల ప్రాంతంలో విద్యార్థుల తల్లిదండ్రులు గుంపులుగా స్కూల్లోకి వ‌చ్చారని, టీకాలు ఇస్తున్నార‌ట క‌దా? అంటూ తమ పిల్లలను బలవంతంగా తీసుకెళ్లారని చెప్పారు. నపుంసక టీకాలు ఇస్తున్నట్లు త‌మ‌కు తమ బంధువులు ఫోన్లో తెలిపారని, మ‌రికొంద‌రు వార్తల్లో చూసి తెలుసుకున్నామ‌ని విద్యార్థుల పేరెంట్స్ నుంచి స‌మాధానం వ‌చ్చింద‌ని ఆయన తెలిపారు. వాట్సప్‌లలోనూ ఈ వదంతులు విప‌రీతంగా వ్యాపించాయి.
