: ఇలాంటి బిరుదులు ఏం చేస్తాయంటే...!: కళాతపస్వి కె.విశ్వనాథ్
ప్రతిష్టాత్మక పురస్కారం దాదా సాహెబ్ ఫాల్కే అవార్డుకు ప్రముఖ దర్శకుడు, కళాతపస్వి కె. విశ్వనాథ్ ఎంపికైన విషయం తెలిసిందే. ఈ నేపథ్యంలో ఓ న్యూస్ ఛానెల్ కు ఇచ్చిన ఇంటర్వ్యూలో ఆయన మాట్లాడారు. ఈ అవార్డు స్ఫూర్తితో మళ్లీ మెగా ఫోన్ పట్టుకునే ఉత్సాహం వస్తుందా? అనే ప్రశ్నకు ఆయన సమాధానమిస్తూ, ‘అదేం చేయదు కానీ, ఇలాంటి బిరుదులు ఏం చేస్తాయంటే .. ఒకవేళ, పొరపాటున పిచ్చిపని ఏమన్నా చేస్తావేమో జాగ్రత్త.. ఆల్ రెడీ, మిమ్మల్ని గుర్తించి ఈ బిరుదు ఇచ్చాము ... ఉన్న పేరు పాడు చేసుకోకుండా ఉండు అని చెబుతాయి. సంప్రదాయాలకు కొంచెం భిన్నంగా వెళ్లినప్పుడు విమర్శలు వస్తాయి. అది..కవిత్వంలో, సినిమాలో, రాజకీయాల్లో కొత్త పుంతలు తొక్కినపుడు విమర్శలు తప్పవు. అయితే, మనం చేసేది మంచిది అనిపించినప్పుడు ధైర్యం ఉండి తీరాలి. భగవంతుడు నాకు అదే ఇచ్చాడు. అదే ఉపయోగించుకుంటున్నాను’ అని విశ్వనాథ్ చెప్పుకొచ్చారు.
