: సుక్మా ఘటన వెనుక మాస్టర్ మైండ్.. ఇరవై నాలుగేళ్ల మావోయిస్టు కమాండర్ హిద్మా?

---

ఛత్తీస్ గడ్ లోని సుక్మా జిల్లాలో రెండు రోజుల క్రితం మావోయిస్టుల ఘాతుకానికి 25 మంది సీఆర్పీఎఫ్ జవాన్లు బలైపోయిన విషయం తెలిసిందే. సుమారు మూడు వందల మంది మావోయిస్టులు ఈ మెరుపు దాడికి పాల్పడినట్టు బాధిత సీఆర్పీఎఫ్ జవాన్ ఒకరు చెప్పడం విదితమే. అయితే, ఇంత పకడ్బందీగా వ్యూహ రచన చేసి, దానిని అమలు చేసిన ‘మాస్టర్ మైండ్’ ఎవరనే విషయమై పోలీసులు ఆరా తీయగా పలు ఆసక్తికర విషయాలు వెలుగు చూశాయి. ఈ వ్యూహ రచన చేసింది, అమలు పరిచింది కరుడుగట్టిన మావోయిస్టు కమాండర్ మద్వి హిద్మా అని, అతని వయసు ఇరవై నాలుగు సంవత్సరాలు అని తెలుస్తోంది. మద్వి హిద్మా గురించి చెప్పాలంటే..

* హిద్మా స్వస్థలం దక్షిణ సుక్మా జిల్లాలోని పుర్వతి గ్రామం.
* ఇతనిని హిద్మల్, సంతోష్ గా పిలుస్తుంటారు.
* సీపీఐ (మావోయిస్టు) మొదటి మిలిటరీ బెటాలియన్ కు మద్వి హిద్మా నేతృత్వం వహిస్తున్నారు.
* బస్రత్ లోని కరుడు గట్టిన మావోయిస్టులలో హిద్మా కూడా ఒకరు !.
* దక్షిణ సుక్మా, దంతెవాడ, బీజాపూర్ ప్రాంతాల్లో కార్యకలాపాలకు హిద్మా నేతృత్వం వహిస్తున్నారు.
* బక్క పలచని హిద్మా మచ్చలేని రెబల్ లీడర్ గా గుర్తింపు పొందాడు.
* తన ప్రాంతంలోని ఇన్ ఫార్మర్లతో నెట్ వర్క్ వ్యవహారాలు నడపడంలో హిద్మా దిట్ట.
* స్థానిక ఏరియా కమాండర్లను, సంఘం సదస్యాస్ (సంస్థ సభ్యులు)ను సమన్వయ పరిచే హిద్మాను ‘దేవుడి’తో సమానంగా    భావిస్తుంటారు.
* దళంలోకి కొత్తగా రిక్రూట్ అయిన యువకులకు హిద్మా రోల్ మోడల్.
* ఎట్టి పరిస్థితుల్లోనూ ఆయన  మీడియాకు చిక్కరు. రిపోర్టర్లను దూరంగా ఉంచుతారు.
* హిద్మాకు పహారా కాసే అంతరంగికుల్లో చాలా మంది ఆయన చిన్ననాటి స్నేహితులు.. సాయుధులైన యువకులే!