: ప్రజా సమస్యలను తెలియ‌జేస్తోన్న మహిళా జర్నలిస్టును కొట్టిన పాక్ పోలీస్
ప్రజా సమస్యలను తెలియ‌జేస్తూ లైవ్ రిపోర్టు చేసే మహిళా జర్నలిస్టుపై పాకిస్థాన్ ఫ్రాంటియర్ కానిస్టేబులరీ(ఎఫ్ సీ) గార్డు దాడి చేసిన ఘ‌ట‌న క‌రాచీలో చోటుచేసుకుంది. ఈ ఘ‌ట‌న స‌మ‌యంలో తీసిన వీడియో ప్ర‌స్తుతం సామాజిక మాధ్య‌మాల్లో వైరల్ గా మారింది. ఆయ‌న తీరుపై నెటిజ‌న్లు ఆగ్ర‌హం వ్య‌క్తం చేస్తున్నారు. కరాచీలోని నాద్రా రిజిస్ట్రేషన్ కార్యాల‌యంలో స్థానికులు ఎదుర్కొంటున్న సమస్యలపై లైవ్ రిపోర్టు చేయడానికి పాకిస్థాన్ లోని కే-21 ఛానల్ లో ప‌నిచేస్తోన్న సైమా కన్వల్ వ‌చ్చింది. ఆ కార్యాల‌యంలో ఎఫ్ సీ గార్డు ఆమెను అడ్డుకుని, కొట్టాడు. ఈ మొత్తం స‌న్నివేశం కెమెరాకు చిక్కింది. దురుసుగా ప్ర‌వ‌ర్తించిన ఎఫ్ సీ పోలీస్ గార్డుపై గుల్ బహార్ పోలీసు స్టేషన్లో కేసు నమోదు చేశారు. దాడి చేసిన వ్య‌క్తిని తమకు కస్టడీకి ఇప్పించాలని ఎఫ్ సీ అధికారుల‌ను పోలీసులు కోరారు. అయితే, స‌ద‌రు రిపోర్ట‌ర్‌కు వ్యతిరేకంగా కూడా ఓ ఎఫ్ ఐఆర్ ను నాద్రా అధికారులు నమోదు చేసినట్టు అక్క‌డి అధికారులు పేర్కొన్నారు. అధికారిక పనిలో ఆమె అడ్డుత‌గులుతోంద‌ని ఫిర్యాదులో పేర్కొన్నట్లు తెలిపారు. ఎంఎన్ఏ పాకిస్థాన్ సల్మాన్ ముజాహిద్ బ్లాచ్ ఈ అంశంపై స్పందిస్తూ.. తన కూతురు లాంటి మహిళా జర్నలిస్టుపై దాడి చేసిన ఆ గార్డుపై చర్యలు తీసుకోవాల్సిందేనని డిమాండ్ చేశారు. స‌ద‌రు పోలీస్ గార్డుపై చర్యలు త‌ప్ప‌కుండా తీసుకోవాలంటూ సోష‌ల్‌మీడియాలో డిమాండ్ లు వ‌స్తున్నాయి.
