: ఎవరెస్ట్ పై నేపాల్ భూకంపం ఎఫెక్ట్ నామమాత్రమే!: చైనా సర్వే సంస్థ వెల్లడి
నేపాల్ ను అతలాకుతలం చేసిన పెను భూకంపం ధాటికి హిమాలయాల్లోని ఎవరెస్ట్ శిఖరం కుంగిపోయిందన్న వార్తల్లో ఎలాంటి వాస్తవం లేదట. నేపాల్ ను నేలమట్టం చేసిన భూకంపం ఎవరెస్ట్ ఎత్తును అంగుళం కూడా కదిలించలేకపోయిందని చైనా సర్వే సంస్థ స్పష్టం చేసింది. భూకంపం తర్వాత కూడా ఎవరెస్ట్ ఎత్తు మునుపటిలాగే 8,848 మీటర్లుగానే ఉందని ఆ సంస్థ వెల్లడించింది. ఎవరెస్ట్ ఎత్తును కుంగదీయలేని భూకంపం సదరు శిఖరాన్ని కొద్దిమేర పక్కకు మాత్రం కదిలించిందట. భూకంపం కారణంగా ఎవరెస్ట్ శిఖరం ఈశాన్యం దిశగా 3 సెంటీ మీటర్ల మేర పక్కకు జరిగింది. పదేళ్ల కాలంలో ఎవరెస్ట్ శిఖరం 40 సెంటీ మీటర్ల మేర పక్కకు జరిగిందని కూడా ఆ సంస్థ వెల్లడించింది. అంటే, భూకంపం కారణంగా ఎవరెస్ట్ భారీ కుదుపులకు గురి కానట్టేనని కూడా ఆ సంస్థ తేల్చిచెప్పింది.
