: యూకే ముక్కలవడాన్ని భరించలేను... విడగొట్టకండి: బ్రిటన్ ప్రధాని
యునైటెడ్ కింగ్ డమ్ (యూకే) నుంచి విడిపోయి స్వతంత్ర దేశంగా ఉండాలని స్కాట్లండ్ లోని మెజారిటీ ప్రజలు భావిస్తున్నారు. దీనికి సంబంధించి ఈ నెల 18న స్కాట్లండ్ లో ప్రజాభిప్రాయ సేకరణ కూడా జరగనుంది. ఈ నేపథ్యంలో, యూకే ముక్కలవడాన్ని తాను భరించలేనని బ్రిటన్ ప్రధాని డేవిడ్ కేమరూన్ ఆవేదన వ్యక్తం చేశారు. నిన్న హుటాహుటిన స్కాట్లండ్ చేరుకున్న ఆయన... అక్కడి ప్రజలను ఉద్దేశించి మాట్లాడారు. "307 ఏళ్లుగా మనమందరం ఒకటిగా కలసి ఉన్నాం. ఈ క్రమంలో ఎంతో అనుబంధాన్ని పెంచుకున్నాం. ఈ అనుబంధాన్ని దయచేసి విడగొట్టకండి. నా పార్టీకన్నా నాకు నా దేశమే ముఖ్యం. నా దేశాన్ని నేను అమితంగా ప్రేమిస్తాను. మనమంతా కలసి నిర్మించుకున్న యూకే విడిపోవడం నేను భరించలేను. దయచేసి యూకేను విడగొట్టకండి" అంటూ స్కాట్లండ్ ప్రజలను కేమరూన్ అభ్యర్థించారు.
