: నన్ను గెలిపిస్తే నియోజకవర్గానికి నిధులు తీసుకొస్తా: జగ్గారెడ్డి
మెదక్ ఉప ఎన్నికలో టీఆర్ఎస్ అభ్యర్థిని గెలిపిస్తే కేంద్రం నుంచి ఎలాంటి నిధులు రావని బీజేపీ ఎంపీ అభ్యర్థి జగ్గారెడ్డి అన్నారు. బీజేపీ అభ్యర్థిగా బరిలో నిలబడ్డ తనను గెలిపిస్తే అధికార పక్షంలో కూర్చుని నియోజకవర్గానికి నిధులను తీసుకువస్తానన్నారు. తనను సమైక్యవాదినని టీఆర్ఎస్ ప్రచారం చేయడం సరికాదని, తెలంగాణ రాష్ట్రం ఏర్పడిన తర్వాత సమైక్యవాదం అనే పదానికి అర్థం లేదని ఆయన అన్నారు. ఓ కేసు విషయంలో సిద్ధిపేట కోర్టులో జడ్జి ఎదుట హాజరైన అనంతరం ఆయన మీడియాతో మాట్లాడుతూ... సిద్ధిపేట టీఆర్ఎస్ జాగీరు కాదని వ్యాఖ్యానించారు. సిద్ధిపేటలో ప్రచారం నిర్వహిస్తే తమ శ్రేణులు అడ్డుకుంటున్నాయన్న టీఆర్ఎస్ ప్రకటించిన విషయాన్ని మీడియా ప్రస్తావించగా... ప్రజాస్వామ్యంలో ఎవరినీ అడ్డుకునే హక్కు టీఆర్ఎస్ కు లేదన్నారు.
