: నేనెవరి తరఫున ఎన్నికల ప్రచారంలో పాల్గొనను: సినీ నటి సమంతా
తాను ఎన్నికల ప్రచారంలో పాల్గొనబోతున్నట్లు మీడియాలో వస్తోందని... కానీ, తాను ఎవ్వరి తరపునా ఎన్నికల ప్రచారం చేయనని సినీ నటి సమంత స్పష్టం చేసింది. హైదరాబాదులోని ఓ హోటల్ లో జరిగిన కార్యక్రమంలో సమంత మాట్లాడుతూ... రాష్ట్రంలో జరుగుతున్న ఎన్నికల గురించి అడిగి తనను వివాదాల్లోకి లాగవద్దని చెప్పింది. అయితే, మంచి నాయకుడిని ఎన్నుకోవాలని ఆమె సూచించింది. ‘‘ప్రజాస్వామ్యంలో మనకున్న అద్భుతమైన శక్తి ఓటు. ఆ శక్తిని సద్వినియోగం చేసుకుంటేనే దానికి సార్థకత. మనల్ని పరిపాలించే నాయకుణ్ణి ఎన్నుకునే అవకాశం కల్పించే ఓటును సరిగా వినియోగించుకోవాలి. సుపరిపాలన అందించే సమర్థవంతమైన నాయకుడిని ఎన్నుకోవడానికి ప్రతి ఒక్కరూ తప్పనిసరిగా ఓటు వేయాలి’’ అని సమంతా చెప్పింది.
