టీ-శాట్ నెట్ వర్క్ ఛానళ్ల యాప్ @వన్ మిలియన్.. మంత్రి కేటీఆర్ అభినందన
- అభినందించిన మంత్రి కేటీఆర్
- ఇదే స్ఫూర్తిని కొనసాగించాలని అధికారులకు సూచన
టీ-శాట్ నెట్ వర్క్ ఛానళ్ల యాప్ పది లక్షల డౌన్ లోడ్లు కావడంతో బుధవారం ఐటి, మున్సిపల్ శాఖా మంత్రి కె.టి.రామారావును తన క్యాంపు కార్యాలయంలో ఐటి శాఖ ముఖ్యకార్యదర్శి జయేష్ రంజన్, టీ-శాట్ సీఈవో ఆర్.శైలేష్ రెడ్డి, డిజిటల్ మీడియా డైరెక్టర్ కొణతం దిలీప్ కలిశారు. ఈ సందర్భంగా మంత్రి కేటీఆర్ అధికారులతో కలిసి మొబైల్ ను ప్రదర్శిస్తూ అభినందనలు తెలిపారు.
విద్యార్థులకు కష్ట కాలంలో టీ-శాట్ యాప్ ఎంతగానే ఉపయోగపడిందని, కోవిడ్-19 ప్రభావంలో విద్యా శాఖకు ప్రత్యామ్నాయ మార్గంగా టీ-శాట్ నెట్ వర్క్ ఏర్పడిందన్నారు. డిజిటలైజషన్ విద్యను మారు మూల ప్రాంత ప్రజలకు, పేద విద్యార్థులకు అందించడంలో టీ-శాట్ చేస్తున్న కృషి అందరికీ ఆదర్శమని కొనియాడారు. ఒక విద్యా శాఖకే టీ-శాట్ సేవలు పరిమితం కాకుండా రాష్ట్ర ప్రభుత్వ శాఖలన్నింటికీ వేదికగా నిలిచిందన్నారు. వ్యవసాయ, మహిళా శిశు సంక్షేమ శాఖ, వైద్య శాఖ, సాంఘిక గురుకుల సంక్షేమ శాఖల వంటి రాష్ట్ర ప్రభుత్వ శాఖలకు టీ-శాట్ ప్రధాన వేదికగా నిలిచిందని మంత్రి కొనియాడారు. భవిష్యత్ లో టీ-శాట్ సేవలు మరింతగా విస్తరించే విధంగా కొత్త ఆవిష్కరణలు చేయాలని అధికారులకు సూచించారు.
ఇక నుండి సన్ డైరెక్ట్ లోనూ..!
టీ-శాట్ నెట్ వర్క్ ఛానళ్లు ఇక నుండి సన్ డైరెక్ట్ డీటీహెచ్ లోనూ ప్రసారాలు మొదలయ్యాయి. సన్ డైరెక్ట్ డీటీహెచ్ లో విద్య-195, నిపుణ-196 నెంబర్లలో ప్రసారాలు అందుబాటులోకి రానున్నాయని సీఈవో ఆర్.శైలేష్ రెడ్డి ప్రకటించారు. ఇప్పటికే ఏయిర్ టెల్ డీటీహెచ్ లో విద్య-948, నిపుణ-949, టాటా స్కై విద్య-1479, నిపుణ-1480 నెంబర్లలో ప్రసారాలు అందుబాటులో ఉన్నాయని సీఈవో తెలిపారు. ఇప్పటికే రాష్ట్రంలోని 43 కేబుల్ నెట్ వర్క్ ఆపరేటర్ల ద్వార, టీ-శాట్ డీటీహెచ్ ద్వార ప్రసారాలు అందుబాటులో ఉన్నాయన్నారు.