రామ్‌చరణ్‌ సినిమాకు ముహుర్తం కుదిరింది!

రామ్‌చరణ్‌ ప్రస్తుతం 'గేమ్‌ ఛేంజర్‌' ప్రమోషన్స్‌ను ఎగ్రెసివ్‌గా చేసే పనిలో వున్నారు. ఇటీవల లక్నోలో ఈ చిత్రం టీజర్‌ విడుదల వేడుకలో ఆయన పాల్గొన్న సంగతి తెలిసిందే. త్వరలోనే ఈ చిత్రానికి సంబంధించిన మరిన్ని ప్రమోషన్స్‌ టూర్స్‌ను ప్లాన్‌ చేశారు మేకర్స్‌. జనవరి 10న 'గేమ్‌ ఛేంజర్‌' చిత్రం ప్రేక్షకుల ముందుకు రానుంది.

 ప్రముఖ దర్శకుడు శంకర్‌ దర్శకత్వంలో 'దిల్‌'రాజు అత్యంత ప్రతిష్టాత్మకంగా ఈ చిత్రం నిర్మిస్తున్నారు. ఇక ఈ సినిమా విడుదలకు ముందే రామ్‌చరణ్‌ తన తదుపరి చిత్రం చిత్రీకరణ షూటింగ్‌లో పాల్గొన్నబోతున్నాడు. 'ఉప్పెన' దర్శకుడు బుచ్చిబాబు సాన దర్శకత్వంలో చరణ్‌ నటిస్తున్న తాజా చిత్రం చిత్రీకరణ ఈ నెల 22 నుండి మైసూర్‌లో ప్రారంభం కానుందని తెలిసింది. 

ఈ తొలిషెడ్యూల్‌లో హీరో రామ్ చరణ్‌, హీరోయిన్‌ జాన్వీకపూర్‌తో పాటు చిత్రంలో ఇతర ముఖ్య పాత్రదారులు పాల్గొంటారు. కొంత టాకీతో పాటు ఓ యాక్షన్‌ సన్నివేశాన్ని కూడా ఇక్కడ షూట్‌ చేస్తారని సమాచారం. రత్నవేలు డైరెక్టర్‌ ఆఫ్‌ ఫోటోగ్రఫీ అందిస్తున్న ఈ చిత్రానికి ఆస్కార్‌ సంగీత దర్శకుడు ఏఆర్‌.రెహమాన్‌ స్వరాలు అందిస్తున్నారు. 

వృధ్ధి సినిమాస్‌ పతాకంపై కిలారు సతీష్‌ నిర్మిస్తున్న ఈ సినిమాలో రామ్‌ చరణ్‌ పాత్ర ఎంతో వైవిధ్యంగా, మునుపెన్నడు చూడని విధంగా ఉంటుందట. ముఖ్యంగా దర్శకుడు బుచ్చిబాబు చరణ్‌ పాత్రను డిజైన్‌ చేసిన విధానం గొప్పగా ఉంటుందని ఇన్‌సైడ్‌ టాక్‌. క్రీడా నేపథ్యంలో మాసివ్‌ ఎంటర్‌టైనర్‌గా ఈ చిత్రాన్ని బుచ్చిబాబు తీర్చిదిద్దబోతున్నారని అంటున్నారు.