భార్య కదలికలను రహస్యంగా కనిపెట్టే భర్తకథ... 'అథోముగం'... ఓటీటీలో!

తమిళంలో క్రితం ఏడాది రూపొందిన థ్రిల్లర్ సినిమాలలో 'అథోముగం' ఒకటి. మార్చి 1వ తేదీన ఈ సినిమాను థియేటర్లలో రిలీజ్ చేశారు. వసూళ్ల సంగతి అలా ఉంచితే కథాకథనాల పరంగా ఈ సినిమాకి ప్రశంసలు దక్కాయి. సిద్ధార్థ్, చైతన్య ప్రతాప్, అనంత్ నాగ్, అరుణ్ పాండ్యన్ ప్రధానమైన పాత్రలను పోషించిన ఈ సినిమాకి, సునీల్ దేవ్ దర్శకత్వం వహించాడు.

ఈ సినిమా ఇప్పుడు ఓటీటీ ప్రేక్షకులను పలకరించడానికి సిద్ధమవుతోంది. ఈ నెల 10వ తేదీన ఈ సినిమా 'ఆహా తమిళ్'లో స్ట్రీమింగ్ కానుంది. నిజానికి ఈ సినిమాలో పెద్ద తారాగణం లేదు... ఖర్చుపరంగా భారీతనం కూడా కనిపించదు. కానీ అనూహ్యమైన మలుపులతో సాగిపోతూ అడుగడుగునా ఈ కథ ఆకట్టుకుంటుంది. స్క్రీన్ ప్లే పరంగా మొదటి నుంచి చివరివరకూ ప్రేక్షకులను కట్టిపడేస్తుంది.

కథ విషయానికి వస్తే... మార్టిన్-లీనా కొత్తగా వైవాహిక జీవితంలోకి అడుగుపెట్టిన భార్యాభర్తలు. కొత్తగా ఒక యాప్ వచ్చిందనీ... ఆ యాప్ ను ఇతరుల ఫోన్లో ఇన్ స్టాల్ చేస్తే, వారికి సంబంధించిన రహస్య సమాచారం... దృశ్యాలతో పాటు మనకి తెలిసిపోతుందని మార్టిన్ కి ఒక ఫ్రెండ్ చెబుతాడు. దాంతో తన భార్య లీనా ఫోన్లో ఆ యాప్ ను మార్టిన్ ఇన్ స్టాల్ చేస్తాడు. ఆమె గురించి అతనికి ఏం తెలుస్తుంది? ఆ ఇద్దరిలో ఎవరి లోపలి ముఖం (అంతర్ముఖం) ఎలాంటిది? అనేదే ఈ 'అథోముగం' కథ.