Kamala Harris: ట్రంప్‌కు షాక్.. అధ్యక్ష పీఠం కమలా హారిస్‌దే.. జోస్యం చెప్పేసిన యూఎస్ నోస్ట్రడామస్
- నాలుగు దశాబ్దాలుగా జోస్యం చెబుతున్న లిచ్‌మన్
- 2016లో ట్రంప్, 2020లో బైడన్ ఎన్నికవుతారని చెప్పిన హిస్టరీ ప్రొఫెసర్
- నవంబర్ 5న అమెరికా అధ్యక్ష ఎన్నికలు
- ట్రంప్-కమలా హారిస్ మధ్య హోరాహోరీ పోటీ
అమెరికా అధ్యక్ష బరిలో మరోమారు నిలిచిన డొనాల్డ్ ట్రంప్‌కు నిరాశ తప్పదట. భారతీయ మూలాలున్న కమలా హారిస్ ఈసారి అధ్యక్ష పీఠాన్ని అధిష్ఠిస్తారట. అమెరికా నోస్ట్రడామస్‌గా పేరు సంపాదించుకున్న ఎన్నికల విశ్లేషకుడు అలన్ లిచ్‌మన్ ఈ జోస్యం చెప్పారు. వైట్‌హౌస్ రేసులో వున్న ప్రస్తుత ఉపాధ్యక్షురాలు, డెమొక్రటిక్ నామినీ కమలా హారిస్ విజయం సాధిస్తారని లిచ్‌మన్ అంచనా వేశారు. ‘కమలా హారిస్ అమెరికా తదుపరి ప్రెసిడెంట్’ అని ఓ వీడియోను విడుదల చేశారు.
సరిగ్గా మరో రెండు నెలల్లో అంటే నవంబర్ 5న అమెరికా అధ్యక్ష ఎన్నికలు జరగనున్నాయి. కమలా హారిస్, డొనాల్డ్ ట్రంప్ మధ్య పోటీ నువ్వా? నేనా? అన్నట్టుగా సాగుతోంది. అమెరికన్ యూనివర్సిటీలో హిస్టరీ ప్రొఫెసర్‌గా పనిచేస్తున్న లిచ్‌మన్ 4 దశాబ్దాలుగా చెబుతున్న జోస్యాలు నిజమవుతున్నాయి. అందుకే ఆయనంటే అందరికీ గురి. డొనాల్డ్ ట్రంప్ అధ్యక్షుడు అవుతారని 2016లో ఆయన చెప్పిన జోస్యం నిజమైంది. అలాగే, 2020లో బైడన్‌దే విజయమని చెప్పారు. ఇప్పుడు కమలా హారిస్‌దే విజయమని అంచనా వేశారు.
