Budda Venkanna: కొడాలి నాని ఏ దేశానికి వెళ్లినా వదిలిపెట్టరు: బుద్దా వెంకన్న
- వైసీపీలో గుర్తింపు ఉన్న ఒక్క బీసీ నేత కూడా లేరన్న బుద్దా వెంకన్న
- వైసీపీకి రాజీనామా చేసిన అంబటి రాయుడికి శుభాకాంక్షలు తెలిపిన వైనం
- తిరువూరు సభకు విజయవాడ నుంచి ర్యాలీగా వెళతామని వెల్లడి
టీడీపీలో ఉన్న బీసీ నేతలకు, వైసీపీలో ఉన్న బీసీ నేతలకు ఎలాంటి పోలిక లేదని టీడీపీ సీనియర్ నేత బుద్దా వెంకన్న అన్నారు. టీడీపీలో బీసీ నేతలకు పదవులతో పాటు ప్రత్యేక గుర్తింపు కూడా ఉంటుందని చెప్పారు. వైసీపీలో గుర్తింపు పొందిన ఒక్క బీసీ నేత కూడా లేరని అన్నారు. తెలంగాణకు చెందిన బీసీ నేత ఆర్.కృష్ణయ్యకు రాజ్యసభ సీటు ఇవ్వడాన్ని తాము తప్పుపట్టబోమని చెప్పారు. రాజ్యసభలో ఫ్లోర్ లీడర్ పదవిని కృష్ణయ్యకు ఎందుకు ఇవ్వలేదని ప్రశ్నించారు.
తమ అధినేత చంద్రబాబును అరెస్ట్ చేస్తే 100 దేశాల్లో ఆందోళన చేశారని... వైసీపీ గుడివాడ ఎమ్మెల్యే కొడాలి నాని ఏ దేశానికి వెళ్లినా వదలిపెట్టరని వెంకన్న అన్నారు. మాజీ క్రికెటర్ అంబటి రాయుడు ఆడుదాం ఆంధ్రకు బ్యాట్ పట్టుకుని వచ్చారని... జగన్ సైకో అనే విషయం అర్థం కావడంతో పార్టీలో చేరిన వారానికే రాజీనామా చేశారని చెప్పారు. వైసీపీకి రాజీనామా చేసినందుకు రాయుడికి శుభాకాంక్షలు తెలిపారు.
విజయవాడ పశ్చిమ అభ్యర్థి ఎవరైనా గానీ... అందరం కలిసి ఆయన గెలుపు కోసం కృషి చేస్తామని వెంకన్న చెప్పారు. తిరువూరులో జరిగే చంద్రబాబు సభకు విజయవాడ నుంచి ర్యాలీగా వెళతామని తెలిపారు. తిరువూరు సభ నిర్వహణపై విజయవాడ వెస్ట్ నేతల సమావేశం ఈరోజు జరిగింది. ఈ సందర్భంగా వెంకన్న మాట్లాడుతూ పైవ్యాఖ్యలు చేశారు.
