Ambati Rambabu: మంత్రి అంబటి కారుపై పడిన గోధుమ బస్తాలు... తప్పిన ప్రమాదం
- ఖమ్మం వైపు వెళుతున్న మంత్రి అంబటి కాన్వాయ్
- సత్తుపల్లి వద్ద ఘటన
- నాందేడ్ నుంచి గోధుమ లోడుతో వైజాగ్ వెళుతున్న లారీ
- మరో వాహనంలోంచి బయటికి వచ్చిన కర్రలు తగిలి తెగిపోయిన గోధుమ లోడు తాళ్లు
- దెబ్బతిన్న మంత్రి అంబటి కారు బాయ్ నెట్
ఏపీ నీటి పారుదల శాఖ మంత్రి అంబటి రాంబాబు అశ్వారావుపేట నుంచి ఖమ్మం వైపు వెళుతుండగా, అనూహ్యరీతిలో ఆయన కారుపై గోధుమ బస్తాలు పడ్డాయి. అయితే, ఈ ప్రమాదం నుంచి మంత్రి అంబటి త్రుటిలో తప్పించుకున్నారు.
అసలేం జరిగిందంటే... అంబటి రాంబాబు కాన్వాయ్ సత్తుపల్లి వద్దకు చేరుకున్న సమయంలో, నాందేడ్ నుంచి వైజాగ్ కు ఓ లారీ గోధుమ బస్తాల లోడుతో వెళుతోంది. అయితే, సత్తుపల్లి వద్ద హోండా షోరూమ్ సమీపంలో ఓ వాహనం నుంచి బయటికి వచ్చిన కర్రలు తగలడంతో గోధుమ లోడు తాళ్లు తెగిపోయాయి. అదే సమయంలో అక్కడికి వచ్చిన మంత్రి అంబటి కారుపై రెండు గోధుమ బస్తాలు పడ్డాయి. కారు బాయ్ నెట్ బాగా దెబ్బతింది.
ఈ ఘటనపై అంబటి పీఏ పోలీసులకు సమాచారం అందించారు. దాంతో వారు లారీ డ్రైవర్ ను అదుపులోకి తీసుకున్నారు. మంత్రి అంబటి మరో కారులో ఖమ్మం వైపు వెళ్లిపోయారు.
