Shahenshah: ఈ ముర్రాజాతి దున్న ‘షెహన్షా’ ఖరీదు రూ. 25 కోట్లు.. ఆదాయం నెలకు రూ. 9.60 లక్షలు!

- ముర్రాజాతి దున్నల వీర్యానికి దేశవిదేశాల్లో డిమాండ్
- ‘షెహన్షా’ కోసం ప్రత్యేకంగా ఈతకొలను
- ఓ చాంపియన్షిప్లో రూ. 30 లక్షలు గెలుచుకున్న దున్న
హర్యానాలోని పానిపట్ జిల్లా దిద్వాడి గ్రామానికి చెందిన ఓ రైతు వద్దనున్న ముర్రాజాతి దున్నపోతు ధర ఏకంగా రూ. 25 కోట్లు. ‘షెహన్షా’ అని పిలుచుకునే ఈ దున్న నెలకు రూ. 9.60 లక్షలు సంపాదిస్తోంది. నరేంద్రసింగ్ అనే రైతు పెంచుకుంటున్న ఈ మేలురకం దున్న వయసు పదేళ్లు. ఆరడుగుల ఎత్తు, 15 అడుగుల పొడవున్న ‘షెహన్షా’ వీర్యానికి దేశవిదేశాల్లో మంచి డిమాండ్ ఉంది.

నరేంద్రసింద్ తన ‘షెహన్షా’ కోసం ప్రత్యేకంగా ఈతకొలను కట్టించాడు. అంతేకాదు, వివిధ పోటీల్లో ఈ ముర్రాజాతి దున్న విజేతగానూ నిలిచి బహుమతులు అందుకుంది. ఓ చాంపియన్షిప్లో రూ. 30 లక్షలు సొంతం చేసుకుంది. హర్యానాలోని కర్నాల్ నగరం ముర్రాజాతి దున్నపోతులకు ప్రసిద్ధి. వీటిని అక్కడ ‘నల్లబంగారం’గా పిలుస్తారు.