Andhra Pradesh: బాపట్ల జిల్లాలో విజయవాడ–ఒంగోలు హైవే పై దిగనున్న విమానాలు
- 16వ నంబర్ హైవేపై 4 కిలోమీటర్లను ఎయిర్ పాడ్ గా తీర్చిదిద్దిన వైనం
- అత్యవసర సమయాల్లో ల్యాండింగ్ కోసం ఏర్పాట్లు
- ఈ నెల 29న ట్రయల్ రన్
అత్యవసర సమాయాల్లో విమానాలను సాధారణ హైవేలపై దింపుతారు. ఇందుకోసం హైవేల్లో కొన్ని కిలోమీటర్ల మేర రోడ్డును ప్రత్యేకంగా తీర్చిదిద్దుతారు. విదేశాల్లో ఇలాంటి నిర్మాణాలు సాధారణం. ఈ మధ్య భారత్ లోనూ విమానాలు దిగేలా హైవేలను మారుస్తున్నారు. ఉత్తరాదిలో, సరిహద్దు ప్రాంతాల్లో ఎక్కువగా ఇలాంటి నిర్మాణాలు చేపట్టారు. ఇప్పుడు ఆంధ్రప్రదేశ్ లోనూ విమానాలు దిగేలా ఓ హైవేను తీర్చిదిద్దారు. 16వ నంబర్ జాతీయ రహదారిపై విజయవాడ–ఒంగోలు మధ్య ఎయిర్ పాడ్ ను తీర్చిదిద్దారు.
బాపట్ల జిల్లా జె. పంగులూరు మండలం రేణింగవరం, కొరిశపాడు గ్రామాల మధ్య హైవేపై 4 కిలోమీటర్ల మేర విమానాలు దిగేలా సిమెంట్ రోడ్డు వేశారు. ఈ నెల 29వ తేదీన దీనిపై ట్రయల్ రన్ నిర్వహిస్తారు. ఆ రోజు ఉదయం 11 గంటల ప్రాంతాల్లో ఒక కార్గో విమానంతో పాటు రెండు ఫైటర్ జెట్ విమానాలు దిగుతాయి. ఇందుకోసం అధికారులు అన్ని ఏర్పాట్లు చేశారు. ఆ సమయంలో హైవే, సమీపంలోకి ఇతర వాహనాలు రాకుండా ట్రాఫిక్ ను మళ్లిస్తామని అధికారులు తెలిపారు.
