Manava Naik: మరాఠీ నటి మానవ నాయక్‌తో అసభ్యంగా ప్రవర్తించిన ఉబెర్ డ్రైవర్.. ఫేస్బుక్ పోస్టుపై స్పందించిన పోలీసు కమిషనర్
- ఇంటికి వెళ్లేందుకు క్యాబ్ బుక్ చేసుకున్న మానవ నాయక్
- అసభ్యంగా ప్రవర్తిస్తూ బెదిరింపులకు గురిచేశాడంటూ ఫేస్‌బుక్‌లో పోస్టు
- ఇద్దరు బైకర్లు, ఓ ఆటోవాలా తనను కాపాడారన్న నటి
మరాఠీ నటి, దర్శకురాలు మానవ నాయక్‌కు ఉబెర్ డ్రైవర్ నుంచి వేధింపులు ఎదురయ్యాయి. అతడి బెదిరింపులతో తాను చాలా భయపడ్డానంటూ ఆమె చేసిన ఫేస్బుక్ పోస్టుకు ముంబై పోలీస్ జాయింట్ కమిషనర్ విశ్వాస్ నంగ్రే పాటిల్ స్పందించారు. నిందితుడిని పట్టుకుని శిక్షిస్తామని హామీ ఇచ్చారు.
మానవ నాయక్ పోస్టు ప్రకారం.. శనివారం రాత్రి 8.15 గంటల సమయంలో బాంద్రా కుర్లా కాంప్లెక్స్ (బీకేసీ) నుంచి తన ఇంటికి వెళ్లేందుకు నటి ఉబెర్ క్యాబ్‌ను బుక్ చేసుకున్నారు. ఆమె కారు ఎక్కిన తర్వాత డ్రైవర్ ఫోన్ మాట్లాడుతూ నిర్లక్ష్యంగా డ్రైవ్ చేయడం మొదలుపెట్టాడు. దీంతో భయపడిన ఆమె ఫోన్‌ను పక్కనపెట్టాలని పదేపదే అభ్యర్థించినా పట్టించుకోలేదు సరికదా.. ట్రాఫిక్ నిబంధనలు ఉల్లంఘిస్తూ, సిగ్నల్స్‌ను జంప్ చేస్తూ వెళ్తున్న అతడిని ఓ ప్రదేశంలో ట్రాఫిక్ పోలీసులు ఆపి ఫొటోలు తీసుకున్నారు. దీంతో పోలీసులతో డ్రైవర్ వాగ్వివాదానికి దిగాడు.
ఆమె మాట్లాడుతుండగానే డ్రైవర్ మరోమారు కారు వేగం పెంచి దూసుకెళ్లాడు. దీంతో భయపడిన మానవ నాయక్ కారు ఆపాలని కోరారు. అతడు ఆపకుండా వేరే ఎవరికో ఫోన్ చేసి మాట్లాడుతుండడంతో భయపడిన ఆమె రక్షించమని కేకలు వేయడం మొదలుపెట్టారు. గమనించిన ఇద్దరు బైకర్లు, ఓ ఆటోవాలా కారును అడ్డుకుని నటిని రక్షించారు. వారి సాయంతో తాను బయటపడ్డానని, కానీ చాలా భయపడిపోయానంటూ ఫేస్‌బుక్‌లో సుదీర్ఘ పోస్టు చేశారు. కారు నంబరుతోపాటు డ్రైవర్ ఫొటోను కూడా షేర్ చేశారు. దీనికి స్పందించిన పోలీస్ జాయింట్ కమిషనర్.. వీలైనంత త్వరగా నిందితుడిని పట్టుకుంటామని హామీ ఇచ్చారు. నిందితుడి కోసం పోలీసులు రంగంలోకి దిగినట్టు చెప్పారు.
