Telangana: తెలంగాణకు మూడు రోజుల పాటు భారీ వర్ష సూచన
- రాష్ట్రంలోని పలు ప్రాంతాల్లో భారీ వర్షాలు కురిసే అవకాశం
- ఉరుములు, మెరుపులతో కూడిన వర్షాలు కురుస్తాయన్న వాతావరణ కేంద్రం
- ప్రజలు జాగ్రత్తగా ఉండాలని హెచ్చరిక
రానున్న మూడు రోజుల పాటు తెలంగాణలో భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం ప్రకటించింది. రేపు, ఎల్లుండి రాష్ట్రంలోని పలు ప్రాంతాల్లో ఉరుములు, మెరుపులతో కూడిన వర్షాలు కురుస్తాయని హెచ్చరించింది. ప్రజలు తగు జాగ్రత్తలు తీసుకోవాలని, లోతట్టు ప్రాంతాల్లో ఉన్నవారు మరింత జాగ్రత్తగా ఉండాలని సూచించింది.
దక్షిణ ఛత్తీస్ గఢ్ నుంచి తెలంగాణ మీదుగా దక్షిణ ఆంధ్రప్రదేశ్ తీరం వరకు వ్యాపించిన ఉపరితల ద్రోణి ఈరోజు బలహీనపడిందని వాతావరణ కేంద్రం తెలిపింది. నైరుతి దిశ నుంచి తెలంగాణ వైపు కింది స్థాయి గాలులు వీస్తున్నాయని... దీని కారణంగా మూడు రోజుల పాటు వర్షాలు కురిసే అవకాశం ఉందని వెల్లడించింది.
