Junior NTR: రాజమౌళి గారిపై నాకున్న నమ్మకం అది: శ్రియ
- 'ఆర్ ఆర్ ఆర్'లో మెరిసిన శ్రియ
- నా పాత్ర చాలా చిన్నదనే బాధలేదు
- పెద్ద ప్రాజెక్టులో చేశానని గర్వంగా ఉంది
- ఇంకా టిక్కెట్లు దొరకడం లేదన్న శ్రియ
తెలుగులో నిన్నటితరం అందాల కథానాయికగా శ్రియకి మంచి క్రేజ్ ఉంది. సీనియర్ స్టార్ హీరోల సరసన నాయికగా ఆమె అప్పుడప్పుడు తెరపై కనిపిస్తూనే ఉంది. రీసెంట్ గా వచ్చిన 'ఆర్ ఆర్ ఆర్' సినిమాలో అజయ్ దేవగణ్ భార్య సరోజిని పాత్రలో ఆమె కనిపించింది. తెల్లదొరల తూటాలకు నేల కొరిగిన పాత్రలో ఆమె నటన ఆకట్టుకుంటుంది.
అయితే శ్రియ పాత్ర నిడివి చాలా తక్కువ. ఆ విషయంలో ఆమె అభిమానులు అసంతృప్తికి లోనయ్యారు. తాజా ఇంటర్వ్యూలో ఈ విషయంపై శ్రియ స్పందించింది. " రాజమౌళిగారి సినిమా అనగానే నేను ఓకే చెప్పేశాను. కథ ఏమిటి? నా పాత్ర ఏమిటి? ఇంకా ఎవరెవరు చేస్తున్నారు? అనేది నేను అడగలేదు. అందుకు కారణం ఆయనపై నాకు గల నమ్మకమే.
ఈ సినిమాలో నా పాత్ర చాలా చిన్నదని నేను బాధపడటం లేదు. ఒక పెద్ద సినిమాలో భాగమైనందుకు సంతోషపడుతున్నాను. ఈ రోజున ఈ సినిమాను గురించి అంతా గొప్పగా చెప్పుకుంటూ ఉంటే నాకు చాలా గర్వంగా ఉంది. నిజం చెప్పాలంటే ఈ సినిమా టిక్కెట్ల కోసం నేను ఇంకా ట్రై చేస్తూనే ఉన్నాను" అంటూ చెప్పుకొచ్చింది.
