Vijay Antony: 'బిచ్చగాడు' ఫేమ్ విజయ్ ఆంటోని హీరోగా 'హత్య'
- 'బిచ్చగాడు' సినిమాతో క్రేజ్
- తరువాత కలిసిరాని సినిమాలు
- మర్డర్ మిస్టరీ నేపథ్యంలో తాజా చిత్రం
- ముఖ్య పాత్రల్లో మీనాక్షి .. రితిక సింగ్
విజయ్ ఆంటోని పేరు వినగానే ఎవరికైనా 'బిచ్చగాడు' సినిమా గుర్తుకు వస్తుంది. ఆ సినిమాలో ఆయన సహజమైన నటన కళ్లముందు కదలాడుతుంది. ఈ సినిమా తరువాత తన సినిమాలను తమిళంతో పాటు తెలుగులోను రిలీజ్ చేశాడుగానీ ఆ స్థాయిలో ఆయనకి విజయాలు దక్కలేదు. అయితే ఆయన సినిమాలు విభిన్నంగా ఉంటాయనే పేరు మాత్రం వచ్చింది.
ఆయన తాజా చిత్రంగా తమిళంలో 'కొలై' రూపొందింది. తెలుగులో 'హత్య' టైటిల్ తో విడుదల కానుంది. టైటిల్ ను బట్టి ఈ కథ ఒక హత్య చుట్టూ తిరుగుతుందనే విషయం అర్థమవుతూనే ఉంది. యథార్థ సంఘటన ఆధారంగా ఈ సినిమా నిర్మితమైంది. కమల్ బొహ్ర .. ధనుంజయన్ .. ప్రదీప్ నిర్మించిన ఈ సినిమాకి బాలాజీ కుమార్ దర్శకత్వం వహించాడు.
ఒక యువతి హత్యకి గురవుతుంది .. ఆ హత్యా నేరంలో ఐదుగురి ప్రమేయం ఉంటుంది. వాళ్లను కనిపెట్టి పట్టుకునే డిటెక్టివ్ వినాయక్ పాత్రను విజయ్ ఆంటోని పోషించాడు. ఆయనకి సహకరించే పాత్రలో రితిక సింగ్ కనిపించనుంది. ఇతర ముఖ్య పాత్రల్లో మీనాక్షి చౌదరి .. రాధిక .. మురళీశర్మ కనిపించనున్నారు.
