Nurse: బుల్లెట్టు బండి పాటకు డ్యాన్స్ చేసిన నర్సు... మెమో జారీ చేసిన అధికారులు
- ఇటీవల 'బుల్లెట్టు బండి' పాటకు కొత్త జంట డ్యాన్స్
- వైరల్ అయిన వీడియో
- అదే స్ఫూర్తితో నర్సు డ్యాన్స్
- తీవ్రంగా పరిగణించిన అధికారులు
ఇటీవల ఓ కొత్త జంట తమ పెళ్లి ఊరేగింపులో 'నీ బుల్లెట్టు బండెక్కి వచ్చేత్తా పా' అనే ఫోక్ సాంగ్ కు డ్యాన్స్ చేయడం వైరల్ అయింది. ఇప్పుడదే స్ఫూర్తితో 'బుల్లెట్టు బండి' పాటకు డ్యాన్స్ చేసి ఓ నర్సు చిక్కుల్లో పడింది. తెలంగాణలోని రాజన్న సిరిసిల్ల జిల్లా తంగళ్లపల్లి ప్రజా ఆరోగ్య కేంద్రంలో ఒప్పంద నర్సుగా పనిచేస్తున్న రజని అనే యువతి ఆగస్టు 15న విధి నిర్వహణలో ఉండి 'బుల్లెట్టు బండి' పాటకు డ్యాన్స్ చేసింది. ఈ వీడియో వైరల్ కావడంతో అధికారుల దృష్టికి వెళ్లింది.
స్వాతంత్ర్య దినోత్సవం నాడే ఇలా చేయడం, పైగా విధుల్లో ఉండడంతో ఈ విషయాన్ని అధికారులు తీవ్రంగా పరిగణించారు. జిల్లా మెడికల్ అండ్ హెల్త్ ఆఫీసర్ సుమన్ మోహన్ రావు ఈ ఘటనలో సదరు నర్సుకు మెమో జారీ చేశారు. కాగా, దీనిపై నర్సు రజని స్పందిస్తూ, తాను విధులను నిర్లక్ష్యం చేయలేదని, ఇతర ఉద్యోగులు ప్రోత్సహించడంతో డ్యాన్స్ చేశానని వివరించింది.
