Al Hutaib: ఎండ, చలి ఉంటాయి కానీ ఈ ఊర్లో వర్షం మాత్రం పడదు!
- యెమెన్ దేశంలో అల్ హుతైబ్ గ్రామానికి ప్రత్యేకత
- 3,200 ఎత్తున ఓ కొండపై ఉన్న గ్రామం
- ఇక్కడ పగటి ఉష్ణోగ్రతలు, రాత్రి చలి తీవ్రం
- టూరిస్ట్ స్పాట్ గా మారిన గ్రామం
యెమెన్ ఓ అరబ్ దేశం. ఈ దేశానికి రాజధాని సనా. ఈ రాజధాని పరిధిలో అల్ హుతైబ్ అనే సుందరమైన గ్రామం ఉంది. దీని ప్రత్యేకత ఏంటంటే... ఇది భూ ఉపరితలం నుంచి 3,200 మీటర్ల ఎత్తులో ఓ కొండపై కొలువై ఉంది. ఈ గ్రామంలో అల్ బోహ్రా, అల్ ముఖర్మ తెగలకు చెందిన ప్రజలు నివసిస్తుంటారు. అసలు విషయానికొస్తే... ఈ ఊర్లో ఇప్పటివరకు వర్షం పడలేదు. ఈ ఊరు మేఘాల కంటే ఎక్కువ ఎత్తులో ఉండడమే అందుకు కారణం.
అల్ హుతైబ్ లో ఎండ, చలి మాత్రం తీవ్రస్థాయిలో ఉంటాయి. ఎంతో ఎత్తయిన కొండపై ఈ ఊరు ఉండడం వల్ల మేఘాలన్నీ ఈ ఊరు కిందిగా వెళుతుంటాయి. మేఘాలు కొండ కింది భాగంలో వర్షించేటప్పుడు ఈ ఊరి నుంచి స్పష్టంగా కనిపిస్తుంది. దాంతో ఈ గ్రామం ఓ టూరిస్ట్ స్పాట్ గా మారిపోయింది.
ప్రపంచం నలుమూలల నుంచి అల్ హుతైబ్ గ్రామాన్ని చూడడానికి పర్యాటకులు వస్తుంటారు. ఎత్తయిన ఈ కొండపై నిల్చుని, దిగువన ఉన్న మేఘాల నుంచి భూమ్మీదకు జాలువారే వర్షపాతాన్ని చూడడం ఓ మధురానుభూతిగా భావిస్తారు.
